Руска Бурса по Загальным Зобраню 2021

В суботу, 19. червця/юнія 2021 р., в просторах понадстолітнього ґорлицкого будинку при ул. Сєнкєвича 28 проходило Загальне Зобраня членів Стоваришыня Руска Бурса в Ґорлицях. То каждорічна стріча членів общества, якы сумуют діяльніст за минулый рік, крислят пляны на будуче і выберают новы власти.

Як і влони, перше скликаня членів было заплянуване на марец текучого рока, але тырваюча пандемія Covid-19 і рестрикциі з ньом звязаны не дозволили провести Загальне Зобраня в задуманым терміні.

Зас зачали сме смутно…

Од парох років приходит зачынати каждорічну стрічу од хвилі тишы. Тым разом бурсакы станули, жебы пошанувати памят єдного з найвызначнійшых в найновшій істориі Руской Бурсы членів, ініциятора рекативациі і долгорічного предсідателя общества, Богдана Ґамбаля (+02.07.2020 р.), якій одышол влони до Вічности. Хоц влонишнє Загальне Зобраня проходило уж без присутности нашого Приятеля, то тепер уж знаме, же більше не сяде з нами до спільного стола…

Новый член

По выполніню вымаганых законами і статутом общества начальных процедур (выбір ведучого засіданя, протоколянта і выборчой комісиі), зобраны перешли до порядку засіданя, пак до дискусиі над першыма пунктами. Єдным з них был внесок приняти новых люди за членів Руской Бурсы.

Барз добрі знаный в цілорусиньскым світі, але Рускій Бурсі вынятково близкій, бо долго уж діючый як редактор радия і порталю ЛЕМ.фм, Петро Медвідь, по рекомендациі пишучого тоты слова (то традиция общества – начальне представліня кандидата до членства) і голосуваню присутных на зобраню, єдноголосно был принятый до чысла членів Стоваришыня Руска Бурса.

Підсумуваня діяльности за тяжкій 2020 рік

Присутным представленый і омовленый ведучом Наталийом Малецком-Новак был мериторичный справопис з діяльности Стоваришыня Руска Бурса в Ґорлицях за 2020 рік, котрый был принятый і переголосуваный членами орґанізациі. Подібно і фінансовы справописы – од скарбника і од Ревізийной Комісиі – якы приняли присутны, даючы абсолюторию уступлюючому зарядови.

Не был то легкій рік, бо продолжаюча ся пандемія Covid-19 і ограничыня за ньом ідучы были поважным проблемом для каждой інституциі, яка веде проєкты, реализує публичны ґранты. Так, ци так, повело ся выполнити такой вшытко замірене рік перше, чого великом заслугом было добре зрыхтуваня заряду общества до працы і спілпрацы через інтернет, але і добра координация штоденной роботы через ведучу Наталию Малецку-Новак.

Продолжыня роботы

Важным пунктом Загального Зобраня єст выбрати новы власти стоваришыня. Присутны дали довір уступлюючым властям, выбераючы шефовом на дальшу каденцию Наталию Малецку-Новак. Она же представила текучы реализуваны проєкты і одкрыла дискусию тыкаючу актуальной діяльности і плянів на будуче.

Разом з новом ведучом в Головным Заряді Стоваришыня Руска Бурса будут засідати:

• Наталия Малецка-Новак – ведуча
• Даміян Трохановскій – заступник ведучой
• Олена Дуць – секретар
• Андрий Трохановскій – скрабник
• Павел Малецкій – член
• Адам Шевчык – член

До Ревізийной Комісиі были выбраны:

• Яков Зиґмунт – ведучый
• Варвара Дуць – член
• Моніка Тылявска – член

Пошануваня

Уж при кінци засіданя явила ся іщы єдна ініциятива. Члены Руской Бурсы переголосували внесок зложеный зарядом – рішыньом присутных будинок Руской Бурсы буде названый іменом Богдана Ґамбаля. Офіцияльне наданя одбуде ся при нагоді святкуваня 30-літя реактивациі Стоваришыня Руска Бурса, о чым іщы поінформуєме.