Руска Бурса офірує крест Перунчанам

В понедільок 7. вересня 2015 рока Стоваришыня Руска Бурса переказала близко 3-метровий крест з православной церкви в Перунці, якій находил ся в посіданю Стоваришыня отцеви Мирославовы Цідилі, пароховы православной парафіі в Бортным, а родом з Перункы. Крест тот, по выселінях Лемків з Перункы в 1947 році, остал звалений з церкви в 60. роках, коли церков розобрано з перезначыньом будульця під поставліня народного дому в селі. Што ся діяло з крестом през рокы не знатя, але заінтересували ся ним члены Стоваришыня Руска Бурса пару років тому, коли взріли крест, як лежал шмарений поза огороджыньом, якіє окружат цмонтір попри бывшій грекокатолицкій церкви в Перунці. По згоді місцевого римокатолицкого священника на забраня креста з парафіяльной обшыри, крест офіцияльні перешол під опіку Стоваришыня, якє пак вступні го очыстило і переховувло.

Стоваришыня Руска Бурса занимат становиско, же найліпшым місцьом для креста буде не уміщыня го в музейній ізбі, а поставліня го назад там, де його місце – як свідоцтво по жыйючых в Перунці Лемках і памятник назначеной крестом істориі. O. Цідило замірює поставити крест обік перунчаньской ремізы протиогньовой стражы – в місци де колиси стояча православна святиня.

Хто бы лем мал з Вас, дорогы Перунчане, або вшыткы люде доброй воли, фінансово спомочы реновацию креста і його поставліня – просиме о контакт на адрес radio@lem.fm або безпосередньо до о. Цідила (тель. 18 351 84 64).

В 1928 році значуча част Перунчан перешла на православія, якы початково підлігали під парафію Боґуша – Корольова Руска, яка была філю етатовой православной парафіі з Піотркова Трыбунальского. Під конец 1928 рока остала основана окрема філя в Перунці.

З початку богослужыня правлены были на цмонтері, пак в приватній сьвітлици Сергюша Бортничака. Коли в 1928 році скінчено будувати школу, за згодом вшыткых жытелів Перунчан (тіж грекокатоликів), перезначено єй до часу выбудуваня новой церкви на православну часовню. Іщы того самого рока залато будову клебаниі на землі офіруваній през Івана Кунціка.

Будову православной церкви зачато в 1932 році. Землю під церков переказали Татяна Бортничак і Тадей Федорчак. В тожественым посвячыню пляцу під будову церкви участ взяли о. Штефан Пашкєвич, місцевий священник в присутности єґомостів з сусідніх парафіі: о. Александер Іванович, о. Димітр Хыляк і о. Петро Тарановскій.

Дерево під будову переказане осталоз громадзкого ліса, камін взято з каміньоломів родины Бочнєвичів з Чырной і родины Дзядиків з Перункы. Ціліст робіт надзорували теслі з Коломиі. Кресты на банях церкви зробил місцевий коваль Ваньо Олеснєвич.

Церков консекрувано в 1936 році надаючы єй покровительство свв. Космы і Даміана (тых самых, під покровом котрых была грекокатолицак церков). Посвятил церков лвівскій декан архімандрита о. Венямин при уділі декана Лемковины о. Юрія Павлишына і місцевых священників.

Церков в Перунці была зрубовым, трійдільным храмом, вознесеным на пляні грецкого креста, з трьома банями поміщеных на шатровых дахах звінечных кутима крестами. Выгляды в церкви были пілкольесисті заперти. Церков остала розобрана в 60. роках, а окрем реченого креста, памятком по нєй остає іщы дзвін, якій тепер находит ся на прицерковній дзвинниці  в Ґролицях.

фот. lemko.org, архів радия ЛЕМ.фм