Руска Бурса колядувала

Як што рока, Руска Бурса в Ґорлицях просила Лемків в своі порогы, жебы в тым передсвяточным часі вєдно ся зыйти, побесідувати, а што основне про ону стрічу – поколядувати і посмакувати велийных страв. Тогорічна велийна стріча одбыла ся вчера, 29. грудня/децембра, по правді – од самого рана, бо лемківска молодіж і діти пришли в порогы Руской Бурсы завчасу, жебы рыхтувати пару годин велийны стравы, котрых на столі істо было вельо.

Традиция велийных стріч в Рускій Бурсі в Ґорлицях є дост долга. Николи на того рода стрічах не бракувало охочых прити в тот ден до осередка культуры, в котрым окрем потіхы для тіла, все была і втіха для душы. То лемківскє колядуваня, єдного рока шувнійше, поінчы дакус барже скромне – але все – успішне. Як раз, тепер нашы колядкы выконувала лем домашня «Терочка», але поінчы рокы велийна стріча была получена з переглядом колядничых ґруп, де выступувало вшыткого близко сотка лемківской молодежы і діти.

По 16.00 год. ансамбль зачал свій выступ, в котрым присутны почули пару лемківскых коляд. Пак помаленькы діти і молодіж, котры рыхтували стравы під опіком учытелькы лемківского языка Варвары Дуць та Олены Дуць, зачали приношати до прекрасні накрытого стола перогы, бобалькы, грибы, горох і інчы стравы, якы традицийно мож найти на лемківскым велийным столі. Гостину коротком молитвом попередил присутний на подіі о. Павел Стефановскій – настоятель православной парохіі в Щеціні. Пак, было лем сыто і співаючо, коли лем вшыткы дакус покоштували – зачало ся спільне співаня коляд.

Долов пару знимок зо вчерашньой велийной стрічы в Рускій Бурсі.