Русины Закарпатя конґресовали

В суботу 26-го октобра проходив на Українї в Мукачеві Всезакарпатьскый зъїзд Русинів. На стрічу были позваны і представителі Русинів з іншых держав Европы.

Всезакарпатьскый зъїзд Русинів орґанізує Народная рада Русинів Закарпатя, котра є зъєдиненьом майже вшыткых русиньскых орґанізацій, якы дійствують на теріторії Закарпатя. Цільом зъїзду было інформованя окремых членьскых орґанізацій о своїй діяльности, о успіхах і неуспіхах, котры в міджізъїздовім періоді на Русинів чекали, але таксамо дефінованя цілів, на котрых Русины на Українї мусять робити довєдна. На зъїзд дістали позваня і дакотры представителї Русинів з іншых держав, як Мадярьско, Чехія, Словакія, Румунія ці Польща.

Єдным з найголовнішых пунктів зъїзду, окрім вольбы новой презідії Народной рады, было приятя резолуції, котра была схвалена єдномыслено. В тій ся пише, же Русины Україны повно підтримують свою україньску державу в їй намагах о европску інтеґрацію і в намагах о підписаня асоціачного договору во Вільнюсі того року. Вєдно з тым але припоминають, же дотеперь суть в звязаности з Русинами недорішаны два основны вопросы, і то вызнаня Русинів на Україні і таксамо дорішаня вопросу референдума з 1991 року, котре выголосила незалежна Україна і яке мало рішати вопрос самосправованя Закарпатьской области. В ній майже 80 процент жытелів голосовало за автономне справованя в рамках Україны. Україна референдум доднесь не акцептує. Тоту резолуцію Русины Україны хотять загнати в анґліцькым тлумачіню до Вільнюсу, де бы мала Европска унія підписати з Українов асоціачный договор. Русины так хотять схосновати можливость одкрыти їх проблемы перед европскыма демократічныма державами, котры дотеперь ниякым способом не рішали вопрос Русинів на Україні.

Пополідне найперше одбыв ся святковый поход Русинів центром Мукачева з прапорами, котрый закінчів ся положыньом вінцв і квітя коло скулптуры народного будителя Александра Духновіча. Пак вже одкрыв свої двері 15-тый річник фестівалу русиньской културы червена Ружа, в котрім ся за веце як 3 і пів годины вычеряли многы колектівы і соловы інтерпрети. 

Днесь собі припоминаме 95 років од взнику Першой Чеськословеньской републикы, котру засновали і Русины і вдяка котрій могли пізнїше взникнути окремы Чеська і Словацька републикы. Было бы добрі, кібы во Вільнюсі тоты дві державы не забыли на братів, котры з нима творили першу модерну державность тых народів.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА