Русины за океаном рыхтуют великодні стрічы

Час Великого Посту то добрий момент, жебы рыхтувати ся не лем духово до Воскресіня Христового, але і збільшыти своє знаня, або в тот же період припомнути сой про великодні традициі – тіж важны в жытю Русинів. Тым більше, же такой векшіст церковных праздників для Русинів, так дома, як і тых поза границями Карпат, колиси і тепер лучыли ся з народныма звыками, котры на своєрідний спосіб дают причынок підкрислити вынятковіст русиньской традициі Великодніх Свят. Так тіж, сосласно тому, што тепер в моді (а в моді, як раз, орґанізация вельох подій, котры припоминают традицию Великодня), американьскы Русины рыхтуют ся стрічати, жебы точно рік-по-рік дальше продолжати тоту прекрасну традицию батканя яєц і розповіданя про нашы святочны звыкы. 

Локальна еміґрация в Полудньовій Каролині 

Уж в найблизшу суботу, 18. марця т.р., перша з такых стріч пройде серед місцевой русиньской еміґрациі в Полудньовій Каролині, де в місті Форт Міль, якє лежыт поблизко векшого міста Шарльот (St. Philip Neri Church in the Ministry Center, 292 Munn Road East, Fort Mill, SC) одбудут ся двойны варштаты крашыня великодніх яєц. Будут они окремо проведены для дорослых, як і діти. Орґанізаторы інформуют, же варштаты про русиньскы діти сут дармо, зато про дорослых просит ся о платне 10 дулярів. Початок стрічы о 13.30 год. за локальным часом. За деталями смотрте ту. 

Тексас поділит ся тым, што в кошыках 

Другом з подій, на котру просит Карпаторусиньскє Общество в ЗША, одбуде ся в історичным штаті вестерну – Тексасі, в місцевости Плано, што лежыт ближе великого міста Даляс. Тота же подія, не буде посвячена уж рыхтуваню ся до Великодня, але радше радуваню ся з того же Христос Воскрес, точно через зазріня до традицийного кошыка. Што ся в ним находит, а чом як раз кобаса, сіль? – На тоты звіданя будут одповідати місцевы заінтересуваным. Русиньскій кошык то богатий кіш, прото і вшыткы, што до стрічы долучат, будут мати нагоду почестувати ся свяченином (тогорічна Пасха так за григоряньскым як і юлияньскым календарями мат місце вночы з 15/16. квітня/апріля). Додатково, місцеве одділіня Карпаторусньского Общества буде обходило другу річницю свого основаня. З той нагоды буде ділений торт. Про деталі чытайте гев. 

фот. Фейсбук