Русины в Мадярьску будуть припоминати собі Годинку

13-го фебруара 2016 р. в Мадярьску буде проходити День памяти Антонія Годинкы, котрый орґанізує „Вседржавноє Русинськоє Самосправованя“. Два дні перед тым одбуде ся о Годинкови і конференція. Свята привитать головне місто Мадярьска – Будапешть.

Головне свято буде проходити в суботу 13-го фебруара, коли проґрам зачне панахідов на гробі академіка Антонія Годинкы, де Русины положать і вінці. Уж традічно ся буде в рамках Дня памяти Антонія Годинкы передавати і премія, котра несе його мено. Проґрам буде обогаченый концертом. Детайлы проґраму і місце одбываня можете найти на плаґаті під статьов.

Два дні перед тым, 11-го фебруара буде проходити конфернція присвячена памяти Антонія Годинкы. На научній конференції будуть выступати із своїма рефератами Тібор – Мікловш Поповіч, Маріана Лявинець і далшы лекторы. Конференцію орґанізує Столічна русиньска самосправа в місті Будапешть. Ґарантом проєкту є Штефан Лявинець, председа Світовой рады Русинів. Конференція буде проходити на адресі Eötvös 10 Terézvárosi Kulturális Központ kamaraterem, 1067 Budapest Eötvös u. 10.

Антоній Годинка быв вызначный славіста, історік, академік Мадярьской академії наук, ректор Печской універзіты і честный председа Підкарпатьского общества наук. Народив ся 7-го фебруара 1864 року в селі Ладомирів на Пряшівскій Руси. Умер 15-го юла 1946 року в Будапешті.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА