„Русины на Україні мають быти вызнаны,“ говорять домашні охранцьове людьскых прав

Подля членів ґрупы, котра моніторовала права народностных меншын, котры жыють в Закарпатьскій области Україны, Русины на основі своїх очівидных етнічных особливостей мають быти вызнаны як окрема народностна меншына на уровни цілой державы. Днесь о тім інформовав портал РБК – Україна. Навеце бы їм мали быти даны условії містныма державныма орґанами про їх права на народностно-културну автономію в повнім обсягу. Моніторуюча ґрупа о тім пише у своїй штудії. Вєдно з тым ґрупа охранців людьскых прав у штудії пише, же Русины і представителі іншых народностей на Україні суть діскрімінованы в рамках етно-културы.

Коло досліджіня ґрупы, котра была сформована делеґатами орґанізацій про людьскы права зо вшыткых реґіонів Україны, представителями міджінародностных орґанізацій і журналістами, было ословленых веце як 300 русиньскый родин в Ужгородьскім, Мукачівскім, Виноградівскім, Тячівскім, Берегівскім, Рахівскім і Хустьскім районах Закарпатской области. Інформація о порушованю людьскых прав Русинів буде загнана депутатам Европарламенту і Высокому комісарьови ОБСЕ у справах народностных меншын.

Портал РБК – Україна підкреслює, же представителі Русинів веце раз жадали владу Україны, жебы їх вызнали як окрему народностну меншыну, жебы была русинська народность офіціално записана в списку народностных меншын Україны, і жебы была скінчена практіка пронаслідованя прихыльників русиньского руху, котры роблять в державных штруктурах.

Причінов зачатя досліджіня спомянутой ґрупы мала быти серія матеріалів в різных медіях о пробах представителів народностных меншын Закарпатьской области о зорґанізованя діалоґу з владов Україны, повів прес-секретарь Всеукраїньской людьскоправной ґрупы Ігор Новосадюк. Далше Новосадюк інформовав, же причінов того досліджіня было і то, же медії інформовали і о переданю Києву веце як 10 тісяч підписів жытелів Закарпатя за вызнаня Русинів за народностну меншыну і за обновліня діалоґу о шырокій автономії Закарпатя у складі Україны.

Голова Рады народностных меншын Млада Вайсберґ інформовала, же, як то є записане і в штудії подля досліджіня, Русины суть діскрімінованы, чім влада порушує нормы Общой декларації прав чоловіка і іншых документів, котры были прияты на міджінарній ці народній уровнях. Подля слов Вайсберґ, Русины мають мати забеспеченый цілый комплекс прав, котры выходять із леґіслатівы державы, і то: право на народностно-културну автономію, право на хоснованя і навчаня материньского языка ці навчаня материньского языка в державных школах, право на сотворіня народностных културных і навчалных інштітуцій, право на представителів коло орґанів державны.

„Вызываме ОБСЕ і Орґанізацію зъєдиненых народів, жебы до реґіону загнали позорователів про моніторованя сітуації прав народностных меншын і одкрыли вопрос о їх порушованю на пленарнім засіданю Европарламенту,“ закінчує Млада Вайсберґ.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА