Русины на Украіні уж вызнаны!

По скандалічній статі (звязаній з підпорюваном і радийом ЛЕМ.ФМ петицийом), котра была опубликувана на украіньскым сайті Радия Свобода, яка суґерувала, же основны чловечы права выражены в борбі о вызнаня Русинів на Украіні окремым народом, то політычна діяльніст замірена на розбитя територияльной єдности Украіны, редакция, в уж дакус легшым тоні, вертат до темы, бесідуючы з русиньскыма лідерами –  Джоном Ріґетті і Джеймсом Кепчар-Каміньскым.

Хоц арґументация ся не змінят, а русиньскы лідеры не перший раз поясняют ціль петициі, Свобода на одповід приводит тым разом украіньского державного урядника, занимаючого ся етнонацийональном політыком – Генадія Друзенка, котрий заявлят, же Русины уж вызнаны (!), бо в Украіні неє жадных меншын, котры містят ся в катеґориі вызнаня-невызнаня (!). Тым способом – вызнаня Русинів “єст автоматычне, бо неє невызнаня” (!). Окрем того, Друзенці, як делеґуваному занимати ся меншыновом політыком в Украіні, вчас прогулькы на Підкарпатску Русь, на жаль, не повело ся найти ани єдного Русина (!). А тыкаючы тему русиньского языка, державний украіньскій експерт од етнонацийональной політыкы николи не чул о жадным русиньскым словнику (!).

Нич явит ся на нашым портали коментар до статі, приносиме експертови мотузок до величезной роботы Ігоря Керчы – то русиньско-росийскій і росийско-русиньскій словник.