Русины хотять їднати з далшыма меншынами о народностнім законі

В суботу 4-го октобра 2014 р. в Пряшові проходило 13 засіданя Округлого стола Русинів Словеньска (ОСРС), в врамках котрого ся засутпцьове Русинів договорили на зачатю розговорів зо заступцями вшыткых народностных меншын на Словеньску, зо заміром сполочного поступу при просаджованю народностного закона.

Пропозіцію закона о народностных меншынах і о їх фінанцованю, котрый Словеньска републіка не мать і котрый бы мав окрем іншого поїдновати ай о зряджіню а фунґованю меншыновых самосправ, спрацовав председа ОСРС Юдр. Андрій Ліґа і буде частьов Проґраму розвитку русиньской народностной меншыны, выданя котрого ОСРС фіналізує.

Далшым кроком заступців русиньской народностной меншыны буде зачатя їднань з остатніма народностныма меншынами на СЛовеньску зо заміром посилнніня взаємной сполупраці, але головно здобытя што найшыршого консензу і підпоры про приготовльованый народностный закон.

ОСРС так само занимав ся пропозіційов моделу перероздільованя фінанцій в дотачнім проґрамі Уряду влады Словеньской републікы „Култура народностных меншын“. В минулім році ся ОСРС подарило успішно просадити новый способ алокації фінанцій міджі окремы народностны меншыны. Теперь хотять заступцьове Русинів просадити і модел далшого перероздільованя фінанцій в рамках меншыны так, жебы была всокочена контінуалность тых проєктів і актівностей, котры суть про културный жывот русиньской народностной меншыны важны. Піде головно о підору пресы, книжок, медій і найважнішых културных подій. Частьов моделу має быти і можливость, жебы о перерозділіню розрахунку вырішыла каждый рій народностна комісія сама, подля пріоріт, котры в данім періоді має за найважнішы. Мало бы ся так передыйти неефіктовному черьпаню дотацій і акцент бы мав быти положеный на такы актівности, котры мають вартость навеце про благо всокочіня і розвитку културы народностной меншыны.

Доста россягла часть їднаня ОСРС была присвячена і вопросу русиньского народностного школства. Зато на засіданю ОСРС брали участь фаховці і актівісты, котры якраз в области школства дійствують, як доц. Анна Плішкова з Пряшівской універзіты, Е. Солейова з комісії про народностне школство Міністерства школства Словеньской републікы і Люба Кральова, орґанізаторка великого проєкту вечерніх школ русиньского языка про діти і дорослых. Вопрос русиньского народностного школства є єдным із пріоріт, котры будуть обсягом приготовлиованого Проґраму розвитку русиньской народностной меншыны.

Петро Медвідь, говорця ОСРС