Русины днесь занимали ся леґіслатівов. Бісідовали і о ПУЛЬС-і

ОСРС днесь на своїм засіданю докінчів припомінкованя части приготовльованой пропозіції Закона о народностных меншынах, котрый є присвяченый народностным самосправам. Пропозіцю, котра выходить од ОСРС, приготовльовав ґарант робочой ґрупы про область леґіслатівы і сучасный председа платформы ЮДр. Андрій Ліґа. По цілковім докінчіню тексту закона, буде пропозіція дана на верейну діскузію.
–
Русиньска платформа днесь занимала ся і одкликаньом свого члена Владиміра Марушіна із функції директора ПУЛЬС-у. Тот быв на засіданю ОСРС і участный і членам одповідав на звязаности зо своїм одкликаньом. Округлый стіл Русинів Словеньска ся не буде одностити до того, ці быв бывшый директор одкликаный правом, або ніт. Обстоює своє, же вырішованя ПСК в справах, котры ся дотуляють русиньской народностной меншыны, мусить быти конзултоване з єй заступцами. ОСРС ся зато писмом оберне на Міністерство културы СР і Пряшівскый самосправный край, жебы в будучности такый поступ быв практізованый. Русины будуть надале жадати і то, жебы ПУЛЬС перешов під зряджовательске покровительство Міністерства културы.
–
Петро Медвідь, пресовый говорця ОСРС