Русины дістануть веце

На будучій тыждень Уряд влады Словацькой републікы выписав школіня, на котрых ся будуть давати інштрукції ку подаваню ґрантовых проєктів в рамках проґраму Култура народностных меншын 2015. Термін подаваня проєктів на слідуючій рік є до 19. януара 2015 р. Уряд уповномоченого влады Словацькой републікы про народностны меншыны бы і такым способом хотів прискорити процес придільованя фінанцій жадателям.

Окрім того, депутаты Народной рады Словацькой републікы тот тыждень схвалили пропозіцію владного закона о державнім розрахунку на 2015 рік з дакілько позмінюючіма пропозіціями. Схвалили і навышіня фінанчных средств про спомянутый проґрам Културна народностных меншыны 2015 о 50 тісяч евро, котре інціовав ведучій Уряду влады Словацькой републікы Іґор Федеріч посередництвом позмінюючой пропозіції підпредседкыні парламенту Яны Лашшаковой у Выборі Народной рады Словацькой републікы про людьскы права і народностны меншыны.

Дотачна сума по конечнім схваліню депутатами парламенту є в цілковій вышці 3 879 250 евро. Наперед была пропонована сума 3 829 250 евро. Інтернетовый сайт Урюду уповномоченого влады Словацькой републікы про народностны меншыны публіковав і перерозділіня фінанцій про окремы народностны меншыны подля крітерій, котры платять вже другый рік і были схвалены Выбором про народностны меншыны і етнічны ґрупы.

Найвеце, 1 955 296 евро, буде приділеных мадярьскій народностній меншыні. На підпору ромской културы ся приділило 664 152 евро. Приліпшыть собі і наша, русиньска народностна меншына. На Русинів піде того року з державного розрахунку 294 032 евро, што є о 30 тісяч евро веце, як минулого року. Народностны меншыны з меншов кількостов членів дістануть дотації од 30 до 90 тісяч евро. Вынятком є україньска народностна меншына, котра і в року 2015 буде тісно над граніцьов 100 тісяч евро.

Высше сумы уж другый рік здобывають Русины і дякуючі тому, же быв схваленый властно позміненый модел перероздільованя грошей міджі меншынами, котрый быв выдуманый Петром Штефаняком, председом орґанізації молоды.Русины і протиснутый у народностнім выборі членами Округлого стола Русинів Словеньска. Тот модел дає меншыні процента навеце покля не має властну державу і рахує із тым, кілько людей ся приголосить нелем ку народности, але і ку материньскому языку. То позітівно овпливнило наш розрахунок, бо веце як 20 тісяч людей собі записало русиньскый язык як материньскый, але не приголосили ся ку нашій народности.

На Русинів на Словеньску бы так в наступнім році мали чекати дві позітівны новости. Є ту намага уряду прискорити процес фінанцованя і сума на нашу културу буде высша. Ці ся досправы ускорить процес фінанцованя, то буде залежати на робітниках уряду. Ці нам высша сума досправды поможе, зясь є вопросом того, як русиньска комісія перерозділить грошы. Значіть, ці ся будуть підпорьовати нашы пріорітны проєкты як преса, медії, книжкы, школство, або буде лем веце фестівалів.

Перерозділены грошы в сумі  3 879 250 евро

Булґарьска народностна меншына                     35 504 евро

Чеська народностна меншына                              229 815 евро

Хорватьска народностна меншына                     48 064 евро

Мадярьска народностна меншына                     1 955 296 евро

Моравска народностна меншына                       30 489 евро

Німецька народностна меншына                         88 880 евро

Польска народностна меншына                           64 683 евро

Ромска народностна меншына                             664 152 евро

Русиньска народностна меншына            294 032 евро

Російска народностна меншына                           53 377 евро

Сербска народностна меншына                           28 706 евро

Україньска народностна меншына                      100 673 евро

Жыдівска народностна меншына                        52 825 евро

Інтеретнічный і інтеркултурный діалоґ            232 377 евро

Петро Медвідь