Русины будуть мати свій радіовый простор уж і в Чехії

В новембрі має на чеській верейноправній радіостаніці Český rozhlas Plus одштартовати нове высыланя про народностны меншыны. Простор в тім высыланю має мати і русиньска народностна меншына жыюча в Чеській републіці. Інформує о тім найновше выданя ґазеты Podkarpatská Rus, котру выдавать Общество приятелів Підкарпатьской Руси (Společnost přátel Podkarpatské Rusi).

Новый проґрам ся в Чеськім розгласі на станіці Plus буде высылати кажду суботу пополідне. Едіторков нового проґраму про меншыны є Таяна Ґашпаровіч Манчалова. Дотеперь мали в Чеськім розгласі свій простор лем Словаци, Поляци, Ромове, Німці, котры мають свої окремы народностны проґрамы.

Новый проґрам дає простор меншынам з меншов кількостьов. Кажда репортаж в проґрамі буде присвячена єдній меншыні. Кажда меншына бы ся у высыланю мала появити раз або двараз до місяця. В новім маґазині дістануть простор Русины, Росіяны, Вєтнамці, Українці, Булгарі, Білоросіяны, Мадярі, Ґреци, Сербы і Хорваты. Своє місце у высыланю буде мати і музика тых народностей.

Высыланя про народностны меншыны во верейноправных медіях існує і в іншых державах. Мож спомянути Словакію, Мадярьско ці Сербію, де існують таксамо проґрамы про русиньску народностну меншыну.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА