Русины в Будапешті припомянули собі вызначны юбілеї

В суботу 16-го новембра 2024-го року в Будапешті одбыла ся шторічна подія Русинів в Мадярьску під назвов Шедевры русинського умілства.

Тот рік подія одбыла ся в просторах Мадярьской академії наук і была орґанізована на честь 20-ой річніці основаня Бібіотекы Русинів Мадярьска імени Іштвана Удварія і Выставной салы русиньской музейной колекції імени Др. Атаназа Фединця, як і общественно-інформатівной ґазеты Русинськый Світ.

Орґанізаторами были Віра Ґіріц – посланкыня за Русинів у Парламенті Мадярьска, і Вседержавне русиньске самосправованя.

Покровительство над тогорічнов подійов Шедевры русинського умілства перевзяв Міклош Шолтес – державный секретарь Одділіня народностей по церьковных і етнічных капчанях при Канцеларії премєр-міністра. Далшыма покровителями были Іштван Шімічков, голова фракції Хрістіаньскодемократічной людовой партії у Парламентi Мадярьска, і Віра Ґіріц.

Подію своїм приговором одкрыв голова Вседержавного русиньского самосправованя Віктор Крамаренко. Присутным приговорив ся і Ференц Калмар, уповномоченоый міністра про політіку сусідьскых капчань Мадярьска.

На події окрім іншых выступала і Мірослава Копинець, позната співачка русиньской народной співанкы із Підкарпатя, котра роками была і членом Заслуженого академічного закарпатьского народного хору.