Русины із збіркы Петра Микулы в нашім музею

Як інформовала Яна Трущінька із Словацького народного музея – Музея русиньской културы в Пряшові, 24-го юна 2022-го року одбуде ся вернісаж новой выставы під назвов Русины в збірці образів Петра Микулы.

Петро Микула є довгорічный русиньскый актівіста, член Русиньской оброды на Словеньску а єдночасно і збератель образів. Русиньска оброда є співорґанізатором той выставы.

„Фактом є, же зберательство творів візуалного уменя не має на Словакії велику традіцію і ґрунт. В русиньскім середовиску то яв унікатный. І кедь ся з ним стрітиме, збератель часто добровольно зіставанть в аноніміті. Свою збірку концепчно, тематічно і квалітатівно выбрушує, тішыть ся з ньой. Но коли вырішыть акуратным способом єй выставити і публічно презентовати, є то у розвитку зберателя якыйсь гранічный пункт. Такый пункт пришов і у русиньского зберателя Петра Микулы з Біловежі, котрый зберательством образів занимать ся вже 20 років, і його богата збірка має дакілько сто умелецькых творів,“ інформовала Трущінька.

Колекція Петра Микулы є заміряна на русиньске вытварне уменя. Суть в ній авторы русиньского походжіня із Підкарпатя і Словакії, головно іде о малярів прославленой Підкарпатьской русиньской малярьской школы. Так само має Петро Микула у своїй збірці словацькых умелців, котры тематічно заминають ся у своїх творах Русинами, головно іде о авторів Кошыцькой модерны.

Выбер із збіркы русиньского зберателя буде в просторах Музея русиньской културы в Пряшові мож видіти од 24-го юна до 31-го юла 2022-го року. Тішыти ся навщівници можуть на веце як 50 творів од 22-ох авторів.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА