Русиньскый музей выставлює Сірку. Вытварник рекапітулує 10 років

Словацькый народный музей – Музей русиньской културы в Пряшові на осінню часть року приготовив далшу міцну выставу, котрой вернісаж одбыла ся в четверь 6-го октобра і буде єй мож видіти аж до кінця новембра 2022-го року.

Музей тот раз выбрав собі молодшого представителя сучасного вытварного уменя на Словакії, умелця русиньского походжіня – Боріса Сірку. Сірка рекапітулує выставов остатню декаду свойой творчости, зато і дістала просту назву – 10 років.

Боріс Сірка

Боріс Сірка (р. 1981), родак із Снины, належыть меджі вытварників середньой ґенерації словацькой вытварной сцены.

По абсолвованю Школы ужытвокового вытварництва в Кошыцях продовжовав штудії на Факулті умень Технічной універзіты в Кошыцях, а абсолвовав і стаж на Академії умень в Празі. Формовав ся під веджіньом такых вызначных умелців як Рудолф Сікора ці Збінєк Прокоп. Лем два рокы тому докінчів і докторандьскы штудії.

Почас третього року высокошкольскых штудій дістав ся до фінале престіжного конкурзу – Премії Оскара Чепана, де быв наймолодшым фіналістом. То помогло му дістати ся до позорности фаховой общіны, і одвтогды творить і выставлює в рамках персоналных ці колектівных выстав.

По высокошкольскых штудіях зачінать робити у слободній професії як вытварный умелець, музикант, пізніше, і аж доднесь, працує на своїй алма матер як научный робітник.

Брав участь на многых конкурзах, здобыв оцініня нелем як вытварник, але у 2015-ім році мав номінацію і в рамках музичной премії Radio_Head Awards в катеґорії Експеріментална музика за свій албум.

Творчость Боріса Сіркы

Вытварну творчость Боріса Сіркы знають нелем дома, але і за граніцями – в Чеській републіці, Фінландії, Белґії, на Україні, в Японії, Тайландії ці Швеції. Має за собов множество персоналных і колектівных выстав, його творы суть в пріватных ґалеріях, але наприклад і в Ґалерії міста Братіславы.

Характерістічным знаком Сірковой творчости суть темны темы іншпірованы літературныма, філмовыма мотівами, коміксами або леґендами різных култур.

Сірку фасцінує горор, історії з духами, окултізм, головно з візуалного боку, што оброблять і подає зрітелям у высоко естетічно обробленій формі. Тым способом з різных плыткых тем і положінь підняв творчость на высшый ступень уменя.

Сірка експеріментує із звуком, анімаційов, образом, фарбами, скулпторьскым і просторовым медіом. У своїм умелецькім проґрамі творить пересягы меджі вытварным, філмовым і музичным уменьом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА