Русиньскый музей рихтує онлайн Ніч музеїв і ґалерій. Варголів музей отворили

Ніч музеїв і ґалерій, котра мала проходити 16-го мая 2020-го року, ся наконець одбуде онлайн 14-го новембра. Проґрам в інтернетовім просторі приготовлює і Словацькый народный музей – Музей русиньской културы в Пряшові.

Наперек тому, же тырвають протиепідеміолоґічны наряджіня, Музей модерного уменя Енді Варгола в Меджілабірцях оголосив, же свої просторы уж одкрывать про навщівників. Пряшівскый русиньскый музей є затля, як нас інформовала директорка Люба Кральова, запертый до 14-го новембра. За найновшыма інформаціями ся про навщівників одкрыє од 18-го новембра.

Русиньска Ніч музеїв і ґалерій

Як інформовав на своїм офіціалнім сайті на сіті Facebook Словацькый народный музей – Музей русиньской културы, до проєкту Ніч музеїв і ґалерій залучіть ся відеозаписами жанорово розмаїтых подій, котры в нім проходили.

„Представиме творчость знамого карікатурісты Федора Віца з його довгодобого кресленого русиньского серіалу Ілько Сова з Баюсова. Його актуална выставка буде в нашім музею до кінця рока. В проґрамі Джез в музею нам заграть клавіріста і композітор Павел Мороховіч. Любителів історії бізовно заінтересує стабілна експозіція Утверди, Боже – з історії Православной церькви на Словакії до 1948-го року,“ авізує русиньскый музей.

В рамках події в онлайн высыланю музей представить і творчость русиньскых літераторів – Владислава Сивого, Йосифа Кудзея, Марії Мальцовской і Даніелы Капральовой. Споминати ся буде і на академічного маляря Михала Чабалу, а дітям в музею прочітають і приповідкы.

В рамках проґраму, котрый буде мож позерати в суботу од 15.00 год. до 20.00 год., буде мож посмотрити і выставку Владиміра Ґаная під назвов Односины. Як інформує музей, тота уж буде доступна лем дакілько днів, бо просторы, де Ґанай має свої образы, зачінають ся реконштруовати.

Мотузок на суботняйшый онлайн проґрам русиньского музея можете найти на його сайті на сіті Facebook.

Музей Варгола одкрытый

Музей модерного уменя Енді Варгола в Меджілабірцях по запертю з причіны протиепідеміолоґічных наряджінь є знова одкрытый од 12-го новембра.

Як повів про аґентуру TASR директор музея Мартін Цубяк, капаціта максімално 40 навщівників платить і далше, єднако як вшыткы остатні наряджіня. „В каждій експозіції нашого музея будеме дозерати на то, жебы в ній было максімално шість особ в єднім моменті,“ доповнив.

Варголів музей навщівило почас тогорічной літньой сезоны понад 12 700 людей. Подля Цубяка іде о абсолутный рекорд дотеперішньой навщівности за 29 років існованя. Векшый інтерес людей о музей приписує двом пропаґачным проєктам, котры вытворили почас запертя в повязаню з першов волнов пандемії на ярь.

Єдным з них є авдіовізуална серія COVID-EO project, на котрім Варголів музей співпрацовав з Факултов умень Технічной універзіты в Кошыцях, другым є 150 сітілайтів, котры суть од Братіславы по Гуменне в рамках проєкту Підтримуєме уменя, што быв резултат співпраці музея з орґанізаційов Кvarho13 – Кошыцькы културны центры і платфрмов медіалного уменя MAO.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА