Русиньскый музей позывать на Ніч музеїв і ґалерій

Як інфомрмовала Яна Трущіньска, Словацькый народный музей – Музей русинской културы в Пряшові і тот рік залучів ся до цілоевропской події Ніч музеій і ґалерій, котра є орґанізована під покровительством Рады Европы.

Цільом той події є в штонайвекшій мірі презентовати културну дідовизну, значіня їй всокочіня і охраны при културній выміні,шыріню інформацій о културній розмаїтости окремых країн і реґіонів Европы, при неформалній освіті і култівованім оддыху.

З нагоды Ночі музеї і ґалерій русиньскый музей на 14-го мая приготовив проґрам, котрый буде про навщівників од 12.00 год. аж до 22.00 год. Музей позывать на богатый, пестрый проґрам, в рамках котрого можете видіти нелем постоянны выставы музея, але і актуалну дочасну выставу Лемкы, котра є присвячена 75-ій річніці Акції Вісла.

В рамках проґраму будуть і варштаты, на котрых дорослы і діти будуть вєдно із Ґабріелов Чіасноговов обявльовати чаро орнаменту, зясь досправдове богатство предків в подобі русиньскых звыків і прекрасных кроїв буде презентоване посередництвом двох фолклорных колектівів – Вородай і Тихопоточан.

Про любителів літературы буде презентована поезія сучасных русиньсых авторів, котрых буде чітати актор Іґор Латта. На своє собі прийдуть і діти, про котрых приповідкы прочітать Яна Трущіньска. Закінчіня проґраму буде належати концерту знамой ґрупы Ролланд і Дівочому трію з Чірча.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА