Русиньскый музей понукать едукатівны актівности і конкурз про школярів

Хоць културно-сполоченьскы події суть з причіны пандемії обмеджены, Словацькый народный музей – Музей русиньской културы і в тых днях розвивать свої актівности, котрыма хоче ословити школярів другого ступня основных школ, а нелем їх.

Про малых і дорослых приготовив едукатівны актівности у своїх просторах, про школярів другого ступня літературный конкурз. Хоснує при тім выставкы, котры того часу мож в музею видіти.

Конкурз з Ільком Совом

Як музей інформує на своїм офіціалнім фанпейджі на сіті Facebook, школярі ся можуть запоїти до літературного конкурзу під назвов Ілько Сова з Баюсова. Конкурз є повязаный із выставков Федора Віца, котра была одкрыта в септембері і буде єй мож видіти в просторах музея до кінця октобра.

„Федор Віцо є талентованый вытварник. Но тайносткар. Выдумав жываньского уйка Ільку. Кличе го Ілько Сова з Баюсова. Тот Ілько є на вшыткых його кресленых, гуморных образках. Зробив з нього цілый серіал, котрый є популарный і дорослы го знають. Ілько Сова є старшый, мудрый, підрывачный пан з довгыма баюсами. Но веце о нім нич не знаме, а Федор Віцо, котрый го сотворив, нам не хоче о нім нич прозрадити,“ пише ся у выголошіню конкурзу.

Школярі мають о Ількови выдумати історію, оповіданя, і загнати свій текст до музею. Твор може быти і в стихах. Найгуморнішы творы будуть нагороджены і, як обіцять музей, Ілько Сова прийде і за найуспішнішыма домів.

Едукатівны актівности про малых і дорослых

Музей на місяці октобер і новембер приготовив і коментованы переглядкы выставок, котры теперь мож видіти в його просторах, значіть выставкы Владиміра Ґаная під назвов Односины і споминаной експозіції Федора Віца. Проґрам має назву Жебы сьме жыли уменьом.

Окрім того понукать і творчі варштаты. При Ґанайовій выставці іде о кресліня сухым пастелом, в припаді выставкы Федора Віца участны можуть здобыти зручности при творіню кресленого гумору і коміксу.

Коментованы переглядкы, як і творчі варштаты робить музей без обмеджіня віку. Едукатівны проґрамы суть приготовльованы про ґрупы од 5-ох до 20-ох участных. Веце інформацій о конкурзі і творчіх варштатах мож здобыти на фанпейджі музея на сіті Facebook.

Жрідло фотоґрафії: СНМ – Музей русиньской културы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА