Русиньскый музей Чаром депозіту познакомлює з ремеслами

Словацькый народный музей – Музей русиньской културы в Пряшові своїм навщівникам може днесь вказати штири постоянны выставы, котры суть присвячены історії Русинів, Театру Александра Духновіча і Піддукляньского умелецького людового субору, Ґрекокатолицькій і Православній церькви.

Окрім того в зреконштруованых просторах, в котрых выникла Выставна сала Михала Дубая, музей приготовлює різны далшы, часово огранічнены выставы, котры суть заміряны на історічны русиньскы темы, або на русиньске уменя.

Музей, котрый выникнув у 2007-ім році, самособов і зберать, охранює a професіонално документує артефакты о матеріалній і духовній екзістенції а актівностях русиньского населіня, з чого тій професіоналній інштітуції розростать ся депозітарь.

Якраз до того, навщівникови неприступного простору, вырішыв СНМ – Музей русиньской културы сягнути, і з аретакфтів депозітаря приготовив нову выставу, яку одкрыв у четверь 15-го фебруара 2024-го року у Выставній салі Михала Дубая. Выстава, котру як куратор приготовив етноґраф Мірослав Мороховіч у співпраці з далшов кураторков музея Аннов Симковов, дістала назву Чаро депозіту.

Чаро депозіту є досправды вынятковов выставов. З депозітаря під світло і око навщівників дістало ся велике множество предмeтів, ку котрым ся іншак не мож дістати. Походять якбач із вшыткых реґіонів северовыходной Словакії, в котрых є русиньске населіня.

Тоты артефакты матеріалной народной кутлуры Русинів приближують жывот Русинів в минулости і то, якыма ремеслами, роботами заподівали ся нашы предкы, а вдяка тому, же окремы предметы суть і описаны, молодша ґенерація може научіти ся слова, котры майже цалком счезли із бісіды, бо традічны ремесла і ґаздованя уж днесь мож видіти лем вынятково.

Пастырьство, земледільство, робота з леном, зерном, але і выроба одежды ці шустрованя, млинарьство, ковальство, корытарьство, кошыкарьство і дротарьство, робота з молоком, вівчарство – то вшытко ремесла і роботы, котры даколи жыли вєдно з людми на нашых селах, а о тім днесь свідчать і выставлены артефакты. З тым вшыткым будуть годны познакомити ся навщівници музея, покля підуть посмотрити на Чаро депозіту.

Споминаны темы пояснять нелем выставлены предметы, але і лекторьскы выклады робітників музея а доповнюючі кураторьскы тексты, котры были ку выставі приготовлены. Кедьже в СНМ – Музею русиньской културы уж якыйсь чась є і ательєр а фунґують і творчі варштаты, і в тім припаді собі навщівници будуть мочі дашто із старых ремесел спробовати самы.

Вернісаж выставы Чаро депозіту збогатили музичны гості – Фолклорный колектів Барвінок з Камюнкы і Мужска співацька ґрупа з Літмановой. Выставу буде мож видіти аж до 30-го септембра того року.

Фотоґрафії: СНМ – Музей русиньской културы.