Русиньскы співачкы нагородив пряшівскый архієпіскоп

В неділю 31-го марца 2019 нагородив владыка Йоан (Бабяк), пряшівскый ґрекокатолицькый архієпіскоп і метрополіта Словакії шістьдесять девять віруючіх лаіків, котры суть головно із Пряшівской ґрекокатолицькой архієпархії. Інформовав о тім Пресцентер Пряшівской архієпархії.

По архієрейскій літурґії в Базиліці мінор в Лютині каждому із нагородженых передав метрополіта Памятну медайлу Юбілейного року Пряшівской архієпрахії 2018, котрый святковав ся із нагоды еріґованя Пряшівской єпархії, вєдно із декретом, на котрім є мено нагородженого і причіна нагороджіня.

Нагороджены і русиньскы співачкы

Меджі актуално нагородженыма вірниками суть довгорічны канторы (дякы), кураторы (церьковници), но і віруючі, котры репрезентують Ґрекокатолицьку церьков у співі народных і духовных співанок, в ґоспеловій музиці, хоровім співі ці вытварнім уменю, дале тоты, котры помагають Пряшівскій архієпархії в медіалній области, орґанізованьом подій, фінанчно, ставебно, технічно, архітектонічно, стараньом ся о гробы ґрекокатолицькых священиків, а нагородили ся і люди, котрым ся церьков хотіла подяковати за їх довгорічну службу на Архієпіскопскім уряді в Пряшові.

Не забыло ся ани на тых, котры безплатно своїм выступом збогатили Святочный ґалавечур із нагоды Юбілейного року Пряшівской архієпархії в децембрі 2018-го року.

В списку нагородженых суть і штири співачкы русиньской народной, але і духовной співанкы – Марька Мачошкова, Анна Сервіцька, Моніка Кандрачова і Анна Порачова. Вшыткы мож знати нелем з фолклорной сцены, але і з різных духовных академій, на котрых все презентують русиньску културну дідовизну. Співачкы брали безплатно участь і на споминанім ґалапроґрамі в рамках святкованя юбілею архієпархії.

На медайлі є церьков і ікона

Памятна медайла, котра была нагородженым вручена, была выдана в рамках юбілейного року. На переднім боці є деревяна церьков як єден із сімболів Ґрекокатолицькой церькви, конкретно є то Церьков св. Михаіла Архістратига із села Фрічка, котра была збудована у 1829-ім році. На тім самім боці медайлы є і ікона Краснобрідьской Богородіці. Тота ікона почас цілого юбілею путовала по парохіях архієпархії. Довкола є текст написаный по словацькы – 200. výročie zriadenia Prešovskej eparchie 1818 – 2018 (200-та річніця зряджіня Пряшівской єпархії 1818 – 2018).

На другім боці медайлы находить ся ерб архієпархії зо словацькым текстом – 10. výročie zriadenia Prešovskej metropolie sui iuris (10-та річніця зряджіня Пряшівской метрополії sui iuris). Медайла є выроблена із мосяжи з бронзовов патінов, низкым рельєфом і діаметром 60 мм. Автором є академічный скулптор Михал Ґавула і была выроблена у Монетній фабриці в Кремніці.

Принагода подяковати

Як пише Пресцентер Пряшівской архієпархії, торжество нагороджіня вірників было принагодов подяковати їм за їх жертвующу ся службу про Ґрекокатолицьку церьков. На нагороды пропоновали вірників священици і Архієпіскопскый уряд.

„Даякым способом мож тото торжество прираховати іші до Юбілейного року Пряшівской архієпархії 2018 святкованому із нагоды веце річніць,“ інформує пресцентер.

Окрім 200-ой річніці заснованя єпархії Пряшів припоминав собі попереній рік і 10-ту річніцю піднятя єпархії на архієпархію і Ґрекокатолицькой церькви на Словакії на метрополітну церьков sui iuris. Єдночасно святковало ся і 50 років од обновліня Ґрекокатолицькій церькви у Чехословакії по їй насилнім зрушіню у 1950-ім році комуністічныма властями.

Жрідло фотоґрафій: grkatpo.sk

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА