Русиньскы Міджілабірці і Свідник мають за собов успішны проєкты з Польщов. Рыхтують далшы

Як інформує офіціалный сайт міста Міджілабірці, пріматор міста Владіслав Вішньовскый 30-го януара 2015 р. навщівив новозволеного пріматора міста Санок, на польскім боці, Тадеуша Пюра. На радніці в Саноку были зконштатованы резултаты успішных сполочных проєктів тых двох міст од 2003 р., як і релутаты проєкту, котрый теперь кінчіть, під назвов „Реконштрукція турістічно-рекреачной інфраштруктуры в Саноку і Міджілабірцях“. Тот проєкт быв схваленый іщі у 2010 році.

Далше были проїднаны можливости на далшу співпрацу в проґрамовім періоді 2010 – 2020 в рамках Операчного проґраму черезгранічной співпраці Польща – Словацька републіка.

Другым містом, котре успішно співпрацує з Польщов, є Свідник. Там бы мали быти в куртім часі выбудованы новы дітячі гріща. Інформують о тім Podduklianske novinky. Ку тому поможе проєкт під назвов Родинный рекреачный центер. Місто Свідник тот проєкт реалізує в співпраці з Містом Заґурж в Польщі в рамках Операчного проґраму черезгранічной співпраці Польща – Словацька републіка. Проєкт в цілковій сумі 50 тісяч евро забеспечіть выбудованя двох мултіфункчных гріщ про діти, але і выбудованя центру про матери. Місто чекать на підпис змлувы польскым партнером і по нім будуть ясны далшы етапы реалізації проєкту.

Свідник таксамо в минулости вже Проґрам черезгранічной співпраці Польща – Словацька републіка выхосновав. Остатній проєкт дотуляв ся реконштрукції Културного дому, котрый быв одкрытый в децембрі 2014 р.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА