Русиньскы выданя на Меджінародных торгах книжок в Новім Саді

Як інформовала аґентура Рутенпрес, од 3-го до 13-го марца 2022-го року в Новім Саді проходить Меджінародный торг книжок.

Подія, яка мала минувшый рік перерву із причіны пандемії, є тот рік повязана з подіями, якы проходять в році, коли Новый Сад має тітул Европского головного міста културы. І тот рік на торгах буде представлена нова продукація выдавателів, котры печатають книжкы по русиньскы.

Презентація новых выдань Дружства про русиньскый язык, літературу і културу буде в пятніцю 4-го марца пополідне. Презентованы будуть публікації за рокы 2020, 2021 і 2022. Так само будуть в рамках проґаму і бісіды о презентованых выданях.

Выдавництво Руске слово буде вєдно із Заводом про културу войводиньскых Русинів презентовати свої публікації у четверь 10-го марца.

Якраз в тот день буде представлене і выданя правопису із правописным словарьом, о чім буде бісідовати Михайло Фейса із Одділіня русиністікы Універзіты в Новім Саді, а Міряна Дєкіч представить моноґрафію о нашім найвекшім селі у Войводині – Руськім Керестурі, з назвов Руски Керестур – живот и обичаї Руснацох у обєктиве фотоґрафох Будински.

Як авізує Рутенпрес, Руске слово в тот день одпрезентує наприклад зборник із 5-ой науковой конференції про штудентів, молодых науковців і фаховців, а так само образкову публікацію Карусел.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА