Русиньскій табір і Сойм молодых.Русинів в Малым Липнику

Русиньска молодіжна орґанізация зо Словациі молоды.Русины орґанізує в найблизший вікенд тридньову акцию «Табір з молодыма по русиньскы VII». Подія зачынат ся в пятницю, 9. вересня/септембра т.р. і буде тырвала до неділі, 11. вересня/септембра. Окрем самой ідеі, жебы ся стрітити, на таборі будут ведены ріжного рода варштаты, курсы і прелекциі, тыкаючы так істориі, як і сучастности Русинів в вельох областях знань.

Пятниця презначена єст на приізд участників, але і першу тему о захованю культурной спадковины Русинів, котру представит Петро Мацко. По тым зачне ся інтеґрацийний вечер і представліня приіхавшой на табір молодежы. Каждий оповіст, одкале пришол і постарат ся як найліпше запрезентувати свою рідну околицю.

В суботу, окрем пополудньовых змагань в волейболи і вечерньой школы русиньского танця, веденой членами фольклорного ансамблю Рутенія, на молодіжным таборі будут представлены три темы. О русинькым языку буде оповідал проф. Йосиф Сіпко, языкознавця з Пряшівского Університету в Пряшові, котрий выголосит выклад пн. Початкы русиньского языка і будуваня нацийональной достоменности – Лінґвокультуролоґія Русинів. Шыроко знаний русиньскій грекокатолицкій священник з Камюнкы, о. Франтішек Крайняк – ініциятор першых тлумачынь богослужебных книг на русиньскій язык та пізнійшых тлумачынь Тертаєвангелиі, выступит з темом Русины і Церков од єй початків по сучасніст. Напевно цікавым для молодежы буде стріча з експертом од маркетінґу – Михалом Пилипом, котрий на примірах популяризациі марковых знаків (лоґо) і реклямы/пропаґуваня даякых подій введе присутных в світ маркетінґу.

Послідній ден заплянуваний єст на участ в грекокатолицкій Службі Божій, але, окрем другых пунктів проґраму, і в неділю почуєме тему, звязану з русиньском сучасністю, котру представит шефредактор радия Русин фм – Петро Штефаняк: Як навязати спілпрацу і заохотити молоду ґенерацию Русинів.

Тота тема по части лучыт ся з другом подійом, котра заплянувана на неділю – Соймом орґанізациі молоды.Русины, шторічном стрічом, на котрій проходит підсумуваня дотеперішніх акций, реалізуваных од посліднього Сойму, як і представліня візиі, активности, цілів, і плянів на будуче. Того рока буде выбрана нова Дозорна Рада (контрольний орґан), выберана раз за три рокы; власти молодых.Русинів – предсідатель і заряд, котры тіж выбераны сут раз за три рокы, остают при своіх функциях іщы два рокы, понеже іх выборы спосеред членів орґанізациі проходили влони. Орґанізация молоды.Русины выникла в 2008 р. Од товды аж до минулого рока шефувал ій Петро Штефаняк, а од посліднього Сойму предсідательом той русиньской молодіжной орґанізациі єст Петро Ярінчік.

Табір з молодыма по русиньскы VII і Сойм молодых.Русинів одбудут ся в Малым Липнику, єдным з русиньскых сел в любовняньскій долині на Пряшівскій Руси. Там же каждий рік проходит здобываюча штораз більшы ґрупы прихыльників Русиньска Ватра. 16. липця/юлия т.р. одбыла ся сема едиция той подіі.

На знимці горі: выстава на VII Русиньскій Ватрі в Малым Липнику.