Русиньскій альманах за 2014 рік

Завдякы Штефанови Лявинцьови редакция радия ЛЕМ.фм і бібліотека Руской Бурсы збогатила ся о нове чысло “Русиньского альманаху” за 2014 рік. Редактором того тому є проф. Антоній Лявинец, а выдавцями: Вседержавне Общество Русиньской Інтеліґенциі ім. Антонія Годинкы і Русиньскы Самосправуваня Йожефвароша, Будапешта і Уйбуды.

В змісті альманаху найдеме м. ін. припомніня памятных дат і подій, важных для русиньской соспільности на Мадярах, статя про новы памятникы, поставлены в чест заслуженым Русинам – Іґнатови Рошковичови і Александрови Фединцьови, представліня дослідничой діяльности доц. др Анны Плішковой з Пряшівского Університета, лавреаткы преміі ім. Антонія Годинкы за 2014 рік. Нашли ся дописы, котры сут материялами з науковой конференциі в чест академіка А. Годинкы, по мадярскы текст на тему державной чехословацкой політыкы взглядом Карпатскых Русинів в роках 1919-1924. Дале Мариянна Лявинец припоминат і порівнює два выданя Карпаторусского букваря, И.Добоша і П. Федора з 1925 і 1929 рока, Маґдалина Чубірко в статіі Per aspera – ad astra!, Через тернії ид звіздам! пише про основаня і історию Ужгородского Університета. Окрем того, представлены сут постаті і доробок вызначных Русинів – журналісты і педаґоґа, Андрия Репая, бл. пряшівского владыкы Василия Гопкы, писменника Михала Томчанія і ренесансового писменника-полемісты Михаіла Андреллі.