Русиньске тридення з ватров на Липнику вже будучій вікенд

Вже будучій вікенд буде належати події під назвов Русиньске тридення в окресі Стара Любовня. Русиньскый проґрам на вас чекать од пятніці 17-го юла аж до неділі 19-го юла.

Русиньске тридення – то споїня двох подій, Славностей Русинів під градом, котры орґанізує Русиньска оброда на Словеньску і Русиньской ватры, яка є орґанізована орґанізаційов молоды.Русины.

В пятніцю 17-го юла є приготовленый проґрам в Старій Любовні в рамках Славностей Русинів під градом. Проґрам буде проходити в ґалерії Провінчный дім і на участных чекать промітаня документарного філму Душы Карпат, бісіда із фаховцями на тему Русиньскый кодіфікованый язык в практіці, културный проґрам і діскузія.

На суботу приготовлює ся вже 6-тый річник Русиньской ватры на Малім Липнику. В рамках ватры будуть выступати Анна Порачова, Штефан Штець, Маріянна Железна, Шамбрінці, Майдан, Кечера, братя Ґерековці зо Свідника, Рутенія і Хемлон, Слаковый квартет, ґрупа „Фатьови“ із Підкарпатя і „Руснак – дружство Руснацох у Републики Хорватскей“. Ватру будуть модеровати Володимір Чема і Маріянна Железна.

Неділя належыть знова Славностям Русинів під градом. Проґрам в сканзені в Старій Любовні зачне Божественнов літурґійов в деревяній церькви. Потім буде мож посмотрити выставку образів русиньскых малярів зо збіркы Петра Микулы і славности закінчать ся ґалапроґрамом під назвов „З русиньской студенкы“.

Детайлный проґрам на плаґатах.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА