Русиньске націоналне свято в Маріяповчі

Вседержавне русиньске самосправованя в Мадярьску орґанізує і тот рік Русинське націоналне свято в суботу 27-го мая 2023-го року. На кінцю місяця май мадярьскы Русины зыйдуть ся в стародавнім русиньскім путницькім місці Маріяповч, де доднесь проходять великы одпусты.

Тогорічный русиньскый праздник зачне літурґійов, котру буде в Базиліці святого Михаіла Архістратига одправляти Його Преосвященство Філіп Кочіш, архієпіскоп гайдудороґскый і митрополіта Мадярьска.

По літурґії свято одкрыє Віктор Крамаренко, председа Вседержавного русиньского самосправованя, а приговорить ся участным і Іштван Шімічков, котрый є председом факції Хрістіаньско-демократічной народной партії Парламенту Мадярьска.

В рамках свята традічно буде передавати ся і Премія імени Антонія Годинкы, котру тогорічным лавреатам передасть председа Вседержавного русиньского самосправованя. Проґрам тот рік збогатить святочный концерт Мужского хора святого Єфрема.

Головным покровительом тогорічного Русиньского націоналного свята є Чаба Латорцаі, заступник міністра і парламентарьный державный секретарь. Далшым покровителями стали Іштван Шімічков і Віра Ґіріц, посланкыня Русинів у Парламенті Мадярьска.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА