Русиньска музыка на сальонах

Русиньскій ансамбль з Підкарпатской Руси Гудакы (Hudaki Village Band) был участником Украіньского Тыжня Моды (Ukrainian Fashion Week), якій скінчыл ся 28. червця т.р. вчас котрого презентувано нову колекцию сезону осін-зима 2014/2015.

Карпатска капеля вытворила атмосферу для показу Модового Дому Вікториі Ґрес (Victoria Gres Collection). Дізайнерка Ґрес запрезентувала колекцию, для якой основом были два протиположны світы: етніка і урбаністыка. В заскакуючий спосіб получыла пастельовы полотна з квітныма надруками і з волняныма частями, помішала текстуры і взоры, сягнула тіж по натуральны полотна: гадваб, волну, баволну – для підкрисліня понадчасовой натуры річы.

Гудакы – ансамбль з села Нижнє Селище на Підкарпатскій Руси, якій презентує чутливы та емоцийны мелодиі, для якых основом єст русиньскій фольклор, заграний і заспіваний в автентычний, корінний спосіб. Пониже позерайте на перший відеокліп ансамблю.