Русиньска комісія рекомендовала підпорити 122 проєктів

Остатні два тыждні на Словакії засідають комісії окремых народностных меншын, котры посуджують проєкты поданы на 2016-тый рік. Русьньска комісія засідала в днях 1-го і 2-го марца 2016-го року.

Про русиньску народностну меншыну было того року в рамках проґраму Уряду влады Словацькой републікы під назвов Култура народностных меншын приділеных 294 032 €. Русиньска комісія посуджовала 160 поданых проєктів, із котрых рекомендовала підпорити 122. Комісія є порадным орґаном, значіть, вердікт комісії о вышці підпоры проєкту іщі не мусить быти дефінітівный.

Уряд уповномоченого влады про народностны меншыны і етнічны ґрупы ся на своїм сайті хвалить і рекордно скорым часом підписованя і публікованя першых змлув. Покля комісії зачали засідати в минулім тыждні, уж в пятніцю, 26-го фебруара, были першы змлувы публікованы на Централнім реґістрі змлув, што є сіґналом, же жадателі, котрых змлувы суть публікованы на реґістрі, можуть в найблизшых днях чекати грошы на свої проєкты. Моментално бы мало быти публікованых 5 змлув на підпору 18-ох проєктів в цілковій сумі 100 478 €, доповнює Уряд уповномоченого.

Русиньску комісію про посудожваня поданых проєктів творить пять людей, котры были порпонованы орґанізаціями діючіма в русиньскім русі і пять номінантів Уряду влады.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА