Русиньска делеґація на святкованю СНП

29-го авґуста 2015 р. буде в Баньскій Быстріці проходити святкованя 71-го юбілею Словацького народного повстаня (СНП). В рамках тогорічного святкованя буде святочно одкрыта і табла, на котрій буде напис „Русины“.

Русины вєдно з далшыма народами брали участь на тій про словацьку історію вызначній історічній дії. Хоць остатні народы мають на памятнику Словацького народного повстаня свої камянны таблы з назвов свого народа, котрый брав участь на повстаню, Русины дотеперь такой таблы не мали і о їх участи ся векшынов мовчало. Зміна і вызначный історічный крок одбуде ся аж на тогорічных святкованях, де Русины припишуть ся міджі остатні народы свойов таблов.

Ініціатіву за одкрытя таблы, котра бы припоминала, же на повстаню брали участь і Русины, того року почав довгорічный русиньскый актівіста Іван Бандуріч. На його ініціатіву пришла позітівна одповідь з тым, же табла буде одкрыта як раз почас святкованя 29-го авґуста.

Директоріат Музею Словацького народного повстаня в Баньскій Быстріці в остатніх днях пожадав представителів Русинів на Словакії о офіціалну делеґацію, котра буде участна на тім святочнім акті. На святкованю буде участна офіціална делеґація штирьох представителів Русинів в складі: Іван Бандуріч – ініціатор одкрытя таблы і основаючій член Русиньской оброды на Словеньску, Мілан Мнягончак – председа Русиньской оброды на Словеньску і член Світовой рады Русинів, Андрій Ліґа – председа Округлого стола Русинів Словеньска і Мілан Піліп – секретарь Округоло стола Русинів Словеньска.

Русиньска делеґація почас святкованя положыть вінець під памятну таблу нашым героям.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА