Русинофобія за америцькы грошы

Адміністратіва америцького презідента Доналда Трампа нас каждый день знає несподівати. Крокы, котры оголошать, суть од такых, над котрыма мож махнути руков, аж по такы, коли собі чоловік мусить дати вопрос, ці якраз не кінчіть світ, о котрім сьме собі думали, же ту буде єднакый аж до Страшного суду.

Не будеме теперь робити аналізу ґеополітічных кроків Трампового кабінету, і їх можливых дослідків. Уж і так того было пописане доста. Но в послідніх днях резонує у світовых медіях факт, же америцькый презідент хоче, окрім іншого, скінчіти з фінанцованьом Radio Free Europe/Radio Liberty.

Натеперь Слободна Европа, котра має свою централу од 1995-го року в Празі, „выграла“, бо америцькый суд заблоковав намагы америцькой адміністратівы закінчіти фінанцованя того радія, на што грошы схвалив Конґрес.

Слободна Европа, так сьме єй знали в бывшій Чехословакії, є самособов сімбол, важный елемент боя проти комуністічного режіма. А не похыбую о тім, же і днесь, кедь высылать в 27 языках про 23 країн, має своє значіня.

Особно ся чудую, же якраз на тім хоче шпорити Вашінґтон під владов Доналда Трампа грошы. Бо таке радіо і днесь, в дакотрых припадах не менше як перед роком 1989, має змысел про будованя демокрації, але нелем то. Кедь на то посмотрити з америцького боку, є то і средство якогось впливу.

Кедь має далше пошырьовати ся русинофобія за америцькы грошы, пак дякуєме, не хочеме.

Коли Росія розшырує свої медії, якы мають різны языковы мутації, кедь видиме арабскый телевізный феномен Al Jazeera, є то так дакус властный ґол з боку Споеных штатів Америкы, кедьже Трамп хоче зрушыти і Voice of America – Голос Америкы.

Лемже з русиньского боку треба повісти окрім А і тото Б. Покля бісідуєме о україньскій редакції высыланя, яке має назву Радіо Свобода, пак мі заставліня фінанцованя сердце не ламле. Скоріше навспак, сердце мі ламле тото, де аж дішла Словодна Европа в україньскій верзії.

Кебы сьте перешли наприклад цілый архів їх сайту, не найдете єдну позітівну статю односно Русинів. Радіо Свобода ниґда не збачіло нич позітівне. Наприклад ани втогды, кедь русиньскы орґанізації ясно выступили проти войны, кедь назвали аґресора. Зато бруду тота редакція вылляла на Русинів доста.

Іщі в „предвечур“ войны, в напруженій атмосфері, 23-го фебруара 2022-го року, портал опубліковав статю Олександра Гавроша о столітній войні проти Україны і „лемківскім аґентови впливу“ Дмитрійови Выслоцькім. Од втогды вышли далшы статі, котры будь пошырьовали традічны русинофобны блуды, або „шкандалы“ як кебы з дільні СБУ, припадно холем публіковали статі, в котрых все не забыли припомянути, же Русин – то лем стара назва Українців.

Но і кедь ся вернеме ку проблемі фінанцованя Слободной Европы, пак думам, же мінімално фінанцованя україньской редакції є на продуманя. Бо она давно в припаді Русинів оддалила ся цінностям, котры тото радіо мало шырити. На тото, што роблять, стопроцентно радіо не было основане.

Мож то повісти і іншак. Кедь має далше пошырьовати ся русинофобія за америцькы грошы, пак дякуєме, не хочеме. Старчіть, же ся цілы рокы пошырює за тоты україньскы грошы.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Wikipedia.