Русиния, ПУЛС і Старый новый рік – події на Пряшівщіні

Кiнцьом рока і зачатком того слідуючого, як то вже традіція в тім часі в реґіоні, в котрім жыють Русины, буде проходити много културных подій. Прощаме ся зо старым роком, вітаме новый, за новым календарьом вже скінчів піст. Мы сьме выбрали три події, котры своїм характером перекрачують реґіоналность і стоїть за то звернути на них увагу.

„Русиния“

Мужскый співацькый хор „Русиния“ ся вже етабловав на сцені русиньской музикы. Має за собов реґіоналны выступлліня на русиньскых фестівалах, но спробовав собі уж і професіоналнуу сцену дома і за граніцями. Під покровителльством Амбасады Російской федерації ансамбель  дня 30-го децембра орґанізує Бенефічный концерт. Подія оодбуде ся в Містьскім културнім центрі в Гуменнім і зачаток буде мати о 18.00 год. Вєдно з хором будуть выступати і гості – Марія Гаврилякова, Тріо Маґуровых і Даніел Кульга. На концерт собі мож купити тікеты і допереду в касі Містьского културного центру в Гуменнім.

Старый новый рік

„Русиньскый Сілвестер“ має назву подія, котру уж довгы рокы в тім часі орґанізує Русиньска оброда Реґіоналный клуб в Бардейові. Іде властно о святкованя нового рока за старым календарьом, як ся звыкло называти – о Маланку. Новорічна танечна забава одбуде ся 13-го януара 2017-го року в просторах Готеловой академії в Бардейові. Зачаток забавы буде о 19.00 год. а тікеты мож обїднати на телефонных чіслах, котры найдете на плаґаті під статьов.

ПУЛС

Лем недавно сьме звертали вашу увагу, же наш єдиный професіоналный фолклорный ансамбель – Пуддукляньскый умлелецькый людовый субор выдав новый рождественный албум а приготовлює ку ньому і выступліня. Новорочны концерты, на котрых буде мати ПУЛС і інтересных гостів одбудуть ся так само в януарі. На Великій сцені Театру Йонаша Заборьского можете ансабель видіти 13-го януара 2017-го року о 18.30 год. і 15-го януара 16.00 год. Тікеты собі так само можете купити допереду, контактны даны найдете на плаґаті під статьов.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА