Рушыли консультациі в справі желізниці в Польковицях

Выконавця проєкту представил жытелям три альтернативны трасы желізницьовой леніі, што буде вела через Польковиці. Без огляду на тото, котру выберут, буде то двоторова і зелектрифікувана ленія. Вчас першого етапу консультаций жытелі задавали звіданя і ділили ся вантпливостями. Іх опінія буде ся рахувала при остаточным выборі желізницьовой трасы.

Задачом першого етапу консультаций было представити головны заложыня проєкту та в найвекшых дрібницях зідентифікувати соспільны потребы в тій обшыри.

«Опінія жытелів про тото, яку фінальні трасу буде мала желізниця через Польковиці, є барз важна, зато ведены сут тоты консультациі» – інформує Лукаш Пузнєцкій, бургомайстер Польковиц.

«Маме три вариянты той трасы і про тото сме бесідували. Были звіданя, суґестиі і вантпливости, але найважнійше, што вкінци конкретизуют ся пляны будовы желізниці через Польковиці» – повіл бургомайстер.

Поворот желізниці до Польковиц нагодом на динамічнійшый розвиток

Желізницьова ленія, што буде вела через Польковиці, буде частю Аґломерацийной Желізниці Мідьового Басену, што лучыт Ліґницю, Любін, Польковиці і Ґлоґів. Во вшыткых тых містах прошли соспільны консультациі, якы поділены сут на три етапы.

«За нами є перша част, котра має здіаґнозувати соспільны жаданя в тій обшыри. На каждій такій стрічы дрібницьово презентуєме зарис проєкту, одповідаме на звіданя, принимаме внескы» – повіл представник фірмы, што є выконавцьом проєкту Аґломерацийной Желізниці Мідьового Басену Нижньошлезской Службы Доріг і Желізниці во Вроцлаві (НСДіЖ).

«Іщы на осін зас стрітиме ся з жытелями, жебы підсумувати увагы і вказати спосіб браня іх до увагы в проєкті» – пояснят выконавця.

Посліднім, третім етапом будут соспільны консультациі, вчас котрых представлят заложыня єдного, выбраного вариянту желізницьовой трасы през Польковиці.

Тепер до выбору сут три: першый закладат трасу через обшыр Ліґницкой Специяльной Економічной Стрефы, другій покрыват ся з ідучом через Польковиці державном дорогом но 3, а третій ділит торовиском оселя Полянка з рештом міста. Векшіст присутных на стрічы оповідала ся за першым вариянтом.

Векша плынніст переміщаня ся потяговых складів в обох напрямах

Важном відомістю переданом выконавцьом проєкту, а затвердженом через НСДіЖ, є ґаранция, што проєкт аґломерациной желізниці операт ся на двоторовій, полністю зелектрифікуваній трасі, котром пасажерскы потягы будут мочы іздити зо скорістю коло 120 км/г.

Незалежні од соспільных консультаций выконавця проєкту буде вюл анкєтовы баданя серед жытелів ґміны Польковиці, жебы шырше познати чого ждут. Неодолга анкєта в паперовій формі буде доступна в сідибі ратуша та в електронній формі на сайті уряду.

Фот. polkowice.eu