Рушают пробы «Лемковины» !!!

Приносиме вам долгождану віст – Репрезентацийний Ансамбль Лемків в Польщы «Лемковина» взнoвлят пробы!

Як можете прочытати долов на поміщеным оголошыню, пробы і зґрупуваня рушают з дньом 14. серпня тр. О участ прошены сут вшыткы бывшы члены ансамблю і новы особы, охочы записати ся до хору і капелі.

В кажду суботу в годинах  12.00-16.00 мож прити до головной сідибы ансамблю – Руской Бурсы в Ґорлицях і зголосити свою кандидатуру на члена ансамблю.

Ансамбль «Лемковинa», з його основательом Ярославом Трохановскым – Маестром, одограл неоцінену ролю в однaвляню ся лемківской достоменности по роках боязни і страху, выклыканых выселінями Лемків. То єден з першых голосів, якій з гордістю бесідувал о нас през нас самых. Быти членом ансамблю «Лемковинa» все было і єст великом честю, а і приємністю, бо ансамбль зосереджал вынятковы, выдатны особливости, якы нерідко, по роках членства в «Лемковині», на власну руку продолжали і музычны карєры, і плекали лемківскіст в інчых просторах.

Aнсамбль был оснований в 1969 році. В його склад входил парудесятсобовий мішаний хор, парунадцетособова капеля і танцувальна ґрупа. Його цілю єст і все было продолжаня і розвиток лемківской народной культуры всяди там, де жыли і жыют Лемкы, а ховаючы пару поколінь Лемків, презентувал і плекал лемківску культуру серед інчых народів.

Надієме ся, же уж неодолго почуєме в полній красі пречудовий хор на штырі голосы, незаступлену капелю, і зас вызвучат Горы нашы ци Русенковий гымн На Лемковині, а сам ансамбль дальше буде ховал наступны поколіня свідомых свого Лемків.