RTVS розшырює телевізне народностне высыланя

Радіо і телевізія Словакії (Rozhlas a televízia Slovenska, RTVS) розшырює од понеділька 20-го септембра 2021-го року телевізне народностне высыланя, котре ходить на проґрамі Dvojka.

Высыланя в єденадцятьох языках про 13 народностных меншын мінить час высыланя, а прибудуть і два новы проґрамы. Dvojka принесе позерателям новый блок народностного высыланя каждый робочій день в часі од 8.00 до 9.00 год. Аґентуру TASR о тім інформовав PR манажер RTVS Філіп Пуховскый.

Великый крок про меншыны

„В обємі высыланя RTVS є звекшіня часу народностного высыланя малый крок, но в жывоті народностей є то крок великый, практічно робиме двараз таке высыланя. В тім році штартуєме першу фазу схваленой Концепції народностного высыланя,“ повів директор Секції народностного высыланя RTVS Аттіла Ловас.

Доповнив, же в другій фазі, в році 2022, прибудуть далшы проґрамы про народностны меншыны у высыланю.

Понедільковы рана будуть належати народностям, котры мають мале чісло членів. Будуть то півгодиновы маґазіны і новый проґрам з кошыцького штудія з назвов Од джерела (Od prameňa). У віторкы ся будуть черяти проґрамы про русиньску і про україньску народностну меншыну.

Середы і пятніці буде RTVS высылати в мадярьскім языку і окрем денных новин буде ходити традічный мадярьскый маґазін Сьме дома (Sme doma) в середу рано доповненый о традічный реґіоналный формат Лабода (Laboda). В пятніцю буде высыланя по мадярьскы в рамках проґраму під назвов Добрый день, Патрія (Dobrý deň, Patria), якый буде занимати ся общественныма, господарьскыма і політічныма темами.

Каждый четверь буде належатии проґраму Ромскый маґазін, (Rómsky magazín), котрый буде доповненый новым форматом Романо Геро (Romano Hero).

Будуть і народностны діскусії

Раз до місяця буде мож позерати діскусны релації з общественного і політічного жывота. Тот рік будуть діскусії лем в мадярьскім і ромскім языку. Слідуючій рік бы уж мали до высыланя прибыти і діскусії по русиньскы.

„Будучорічный план высыланя про народности приспособиме, в згоді зо законом, новым даным зо списованя жытелів,“ сконштатовав Ловас.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА