Рождественный вечур в музею

Послідньов тогорічнов подійов в Словацькім народнім музею – Музею русиньской културы в Пряшові буде Рождественный вечур, котрый одбуде ся в пятніцю 13-го децембра 2024-го року.

Як за музей інформовала Яна Трущіньска, навщівників події чекать концерт рождественных коляд в інтерпретації Хору святого Романа Сладкопівця, якый буде доповненый духовным словом архімандріты Марка Дурлака – протосінкела Пряшівской архієпархії.

Хор святого Романа Сладкопівця творять богословы Ґрекокатолицькой священьской семінарії блаженого Павла Петра Ґойдіча в Пряшові. Выникнув іщі в 1993-ім році. В хорі од його основаня вычеряло ся множество членів, і вело го дакілько діріґентів. Того часу діріґентом хору є отець Томаш Пецух.

Хор почас свого веце як 30-річного існованя выдав три албумы, і окрім Словакії выступав і в Польщі, Чеській републіці, Австрії, Німецьку, Франції, Портуґалії, Італії, Мадярьску, на Україні і в Споєных штатах Америкы.