Роздзіля, Боднарка повірены Богородици. Резолюция Ґміны Липинкы

Вчас сесиі, котра одбыла ся 8. грудня/децембра т.р., в ден католицкого свята Непорочного Зачатя Дівы Мариі, радны Ґміны Липинкы, в котрій находят ся і лемкіскы села, як Роздзіля ци Боднарка, приняли резолюцию оддаючу Ґміну Липинкы покрові Богородиці.

За резолюцийом оповіло ся дванадцетеро з тринадцетеро радных, беручых участ в засіданю. Од голосу стримала ся радна з Роздзіля Лідия Тылавска. Неприсутны были радны: Юзеф Вальчык з Криґу та Казімєж Вєнцек з Боднаркы.

Проєкт резолюциі запропонувал війт ґміны Чеслав Ракочый. Одчытал го ведучый рады ґміны Боґдан Челусняк, якій припомнул зобраным, што в прошлым радны ґміны приняли уж подібны резолюциі, м.ін. в обороні креста та хоронячу молодіж перед шкідливыма ідеолоґіями і згіршыньом. Вітіркову резолюцию окрислил завершыньом великых резолюций, котры творят спільну «малу моральну конституцию» Ґміны Липинкы.

Рада Ґміны Липинкы рішыла: «Дякуючы Богородици за дотеперішню опіку, оддаєме себе, вшыткых жытелів та вшыткы справы, котры згідні з компетенциями Ґміны Липинкы сут реализуваны, опіці Богородиці». Так звучыт початок першого параґафу принятой резолюциі.

В змісті резолюциі є м.ін. деклярация охороны жытя од зачатя до натуральной смерти, обороны родины розумленой в традицийный спосіб ци права до выховуваня діти згідні з реліґійныма переконанями. Деклярация приносит тіж прошыня до Богородиці підпорити на вшыткых просторах – материяльній, моральній і духовій.