Роверовий райд на Лемковині

26. червця/юнія т.р. на обшыри Лемковины буде проходил роверовий райд Одкрый Пут. Райд буде мал рекреацийний характер і буде получений зо звиджаньом деревяных обєктів (част з них вписаных єст на Листу Світовой Спадковины Юнеско), якы находят ся на Пути Деревяной Архітектуры.

Початок і конец райду буде в Санковій, при костелі свв. Филипа і Якова (обєкт з листы Юнеско), а по дорозі роверисты зазнаємлят ся з красом церкви Покровы Божой Матери в Рыхвалді (обєкт з листы Юнеско), православной церкви свв. Космы і Даміана в Бортным, св. Димитрия в Бодаках і Архістратига Михала в Ропици. В каждій з церкви ждати будут на роверистів провідникы, якы оповідят про історию храму.

Долгіст цілой трасы то 41 км, мож єй переіхати в своім темпі або в зорґанізуваній ґрупі. Важне, жебы змістити ся в зарахуваню вшыткых місц медже 10.00 а 16.00 год. На закінчыня райду, о 17.00 год. орґанізаторы просят на концерт з циклю Світ під Кычером.

Орґанізатором райду єст Ґмінний Осередок Культуры в Санковій, Ґміна Санкова, Малопольска Туристична Орґанізация, Державны Лісы Надлісництво Ґорлиці. Участ в райді треба зголосити через сайт sekowa.pl.