Ровером вздолж Долины Попраду

В Андриівці тырвают роботы при перебудові воєвідской дорогы но 971. Результатом буде дальшый одтинок роверовой стежкы, яка входит в склад трасы EuroVelo 11. Закінчыня на тым одтинку робіт при пути для роверистів плянуване є під конец червця.

В рамках проєкту будовы трасы EuroVelo 11 на обшыри ґміны Мушына рыхтуваный є дальшый одтинок біциґльовых стежок. Тым разом ведена єст перебудова воєвідской дорогы но 971, через што в Андриівці буде находил ся пут для любителів двох колес.

Траса веде од Мушыны (желізницьовый дворец) границьом державы через міст на другій беріг – на Запопрадя, дале вершком до Леґнавы, пак через лавку до Милика і Андриівкы, зас лавком до Малого Липника, через Сулин до Мнішка і дале до Нового Санча.

Разом проєкт обнимат будову кус більше як 28 км одтинка трасы EuroVelo 11 медже Мушыном а Мнішком над Попрадом, в тым будову двох лавок на ріці Попрад (Леґнава-Милик та Андриівка-Малый Липник), а тіж ознакуваня одтинка дорогы о малым насиліню руху, якій лучыт Долину Попраду з Пряшовом на долгости 72 км. Позначкы роверовой дорогы находити ся будут на трасі од Малого Липника через гору на Плавницю, Липаны, Сабинів, Великій Шариш до Пряшова.

Ціліст роблена є згідні зо стандардами передвидженыма для трас пути EuroVelo. Для той части особливым є то, же стежка переходила буде раз по польскій, раз по словацкій страні границі, а по правді – просто медже русиньскыма селами.

EuroVelo то проєкт, в рамках котрого побудуваных має быти 14 долгоoддаленых біциґльовых пути, якыма мож переіхати цілу Европу. Має свій початок на Нордкап в Норвеґіі і веде через 11 держав, аж до Атен в Грециі.