Ровером в недільне пополудне

8. Етноґрафічный Біциґльовый Райд Слідами проф. Романа Райнфуса выстартує в неділю, 22. вересня/септембра. До выбору сут 3 трасы зо зріжницюваном долгістю і трудністю, кажда кінчыт ся на обшыри Скансену Погіряньского Села в Шымбарку. Пак пройде спільный пікнік.

Дальшый уж раз аматоры роверовых прогульок мают нагоду повести ся путями, котрыма вандрувал польскій етноґраф проф. Райнфус. Вчас свойой дослідничой роботы науковец перешол соткы, як не тисячы кілометрів карпатскыма стежками з фотоґрафічным апаратом в єдній та нотатником в другій руці. Записувал можливі найбільше звязаного з фольклором жытелів Карпат, особливі Лемків. Молодіст пережыл проф. Райнфус в Ґорлицях, пізнійше мешкал в Кракові. Был консультантом проєкту основаня Скансену Погіряньского Села в Шымбарку.

Трасы райду зорґанізувано так, жебы барже і менше вправлены в ізді могли мати приємніст з участи. Заплянувано три трасы:

• заавансувана (роверова), коло 45 км, початок о 12.00 год. спід басену Фаля в Ґорлицях – Рыхвалд (церков Покровы Богородиці в Рыхвалді) – Білянка – Лося (Мазярска Загорода в Лоси) – Білянка (путьом через Містну Гору) – Шымбарк (Церков Рождества Богородиці) – Шымбарк (костел св. Войцєха) – Скансен Погіряньского Села
• середньозаавансувана (роверова), коло 30 км, початок о 13.00 год. на паркінґу в Ґорлицях при ул. Надбжежній – стежка роверова до Шымбарку – Білянка – Лося (Мазярска Загорода в Лоси) – Білянка (убочами Містной Горы) – Шымбарк (Церков Рождества Богородиці) – Шымбарк (костел св. Войцєха) – Скансен Погіряньского Села
• рекреацийна (роверова і піша), коло 10 км, початок о 14.30 год. на паркінґу в Ґорлицях при ул. Надбжежній – стежка роверова до Шымбарку – Шымбарк (Церков Рождества Богородиці) – Шымбарк (костел св. Войцєха) – Скансен Погіряньского Села

По активній части в проґрамі подіі од 16.30 є заплянуваный пікнік з прелекцийом Кристины Райнфус-Януш, дівкы професора. В дальшій части заплянувано концерт народной музикы, едукацийны варштаты, конкурсы, а тіж буде мож попрібувати стравы реґіональной кухні.