Різдвяны концерты Юлиі Дошны

Найблизшы дни принесут любителям голосу выдатной лемківской співачкы, Юлиі Дошны, вельо радости з кількости концертів… але і кілометрів до переіханя.

В посліднім часі лемківска артистка часто концертує разом з лютнистом Антонийом Пільхом, з котрым презентує давны пісні з польско-украіньско-лемківского погранича, зобраны выдантыма фольклористами. Посеред них находят ся коляды, щедрівкы і різдвяны пісні – такій репертуар буде вказаний в найблизшых днях в Перемышли, Ярославі і лемківскій Святковій Великій. За дрібницями смотрте на заміщеных ниже афішах. В імени орґанізаторів і артистів – запрашаме.

Юлия Дошна – лемківска співачка родом з Білянкы, долголітня солістка ансамблю Лемковина, обдарувана теплым, пренимаючым і вынятковым голосом, знаным і любленым уж не лем на Лемковині; концертує по цілій Польщы та поза єй границями, успішні розславляючы музычну спадковину Русинів.