Результаты плястичного конкурсу для діти

«Вшыткы рисункы повинны быти нагороджены, бо в каждым виджу заанґажуваня діти. В каждым мож найти штоси інче, і хоц знам, што не можеме выріжнити вшыткых, то хотіла бы-м, жебы діти знали, же іх працы сут захоплюючы, никотра не лишыла ня обоятном» – бесідує Катажына Тур-Марцішук, членкыня двоособового жырі плястичного конкурсу для діти оголошеного Руском Бурсом.

Кінцьом жолтня/октобра тр. Стоваришыня «Руска Бурса» в Ґорлицях оголосило конкурс для діти пн. «Ілюстрация до выбраного твору Меляніі Собин». Термін надсыланя прац минул 30. листопада/новембра. Задачом діти (до 9 рока жытя) было намалювати образок (свобідном техніком), котрый буде інтерпретацийом выбраного верша Меляніі Собин. Як раз того рока минят 100. річниця народин той лемківской поетесы.

З Бодаків, Высовой, аж і Пшемкова ци Рашівкы

В сумі надосланы были 33 рисункы, зроблены дітми в віку од 4 до 9 років. Молоды артисты схоснували ріжны технікы – малюваня кредками, фарбками, вытинанкы, выклиянкы ци получыня ріжных технік, влучні з поміщаньом на образках елементів натуры (листя, мох, голузкы).

Векшіст рисунків была зобрана опікунами-учытелями лемківского языка з даного предшколя ци школы і переслана до Бурсы. Серед єдиниц, якы взяли участ в конкурсі нашли ся:
– Непублична Основна Школа в Бодаках, учытелька: Oрина Гутыряк;
– Шкільно-Предшкільный Комплекс в Высовій, учытелька: Анна Рыдзанич;
– Основна Школа в Ґладышові, учытелька: Варвара Дуць;
– Публичне Предшколя но 1 в Пшемкові, учытелька: Наталия Кунцік;
– Основна Школа в Рашівці, учытелька: Маргарита Кєц;
Окрем того два рисункы діти з Розділя достарчыла іх опікунка Моніка Тылявска.

«Лем тя треба так любити, як маму»

Векшіст діти рішыла намалювати рисунок будучый інтерпретацийом верша М. Собин пн. «Земльо моя». Част діти выбрала твір «Прид весно», а двоє школярів одважыло ся інтерпретувати «Карпатскы верхы».

В жырі конкурсу засіли: Катажына Тур-Марцішук та Анджей Жыґадло. К. Тур-Марцішук є історичком штукы, інвентаризує памятникы, наштоден професийні занимат ся сохраніньом памятників в Воєвідскым Уряді в Люблині. Рокамы вєдно з родичами (Барбаром Тондос і Єжы Туром) документувала материяльну спадковину Лемковины.

А. Жыґадло то узнаный польскій маляр і консерватор штукы, од років спілпрацує з Руском Бурсом, єст м.ін. автором ілюстраций до двох части книжочок для діти з сериі «Баі Русинів і інчых народів» та авотром образу «Деревце», котрый был головным мотивом лемківского плякату упамятняючого 70. річницю Акциі «Вісла». Його творчіст вказувана є в найважнійшых осередках штукы в Польщы.

«Такы малята, а мают свідоміст характеристичных примет іх родимого краєвиду»

В поконкурсовым протоколі жырі конкурсу подало, што выбір был барз тяжкій і до посліднього моменту сперечали ся о місця і выріжніня. «Барз ня порушыло, што діти поміщали на своіх образках придорожны кресты, церкви і деревяны хыжы. На єдным была аж і студня з корбом! Такы малята, а мают свідоміст характеристичных примет іх родимого краєвиду» – реляцийонує К. Тур-Марцішук.

Жырі в своій оціні на ріжны способы анализувало композицию, тото, як падало світло, спосіб ведіня крискы, фарбы, докладні поясняючы признане місце.

I місце: Aлександер Вонсік (8 років, «Прид весно», школа в Высовій) – праца ориґінальні закомпонувана, знамениті оддаюча климат і зміст верша, котрым є інспірувана, нарисувана в спосіб, котрый захоплює.

IІ місце: Татяна Кєц (8 років, «Земльо моя», школа в Рашівці) – праца, хоц має центральну композицию, має в собі небанальны елементы, знамениті односит ся до верша, є в ній вельо дослівных суґестий, што могло бы быти вадом, але в моій оціні [A. Жыґадло – прип. ред.] праца си з тым порадила. Додатково церков найліпше намалювана зо вшыткых. Ціліст барз старанні зроблена.

IІІ місце: Віктория Пєньонжек (9 років, «Земльо моя», школа в Высовій) – то єдна з технолоґічні ориґінальнійшых робіт на конкурсі. Схоснуваны середкы сут адекватны до заміреной ціли, дают добрый ефект. Кореспонденция з вершом знаменита. На мінус лем дрібны композицийны недостаткы.

Выріжніня:

Татяна Чухта (7 і піл рока, «Земльо моя», школа в Высовій) – то найліпше зо вшыткых намалювана праца. Знаменита під оглядом малярской плямы та локальных (не з тубкы) барв. Як бы барже односила ся до темы верша, то найпевнійше была бы на подіюм.

Ігор Бочнєвич (6 років, «Прид весно», предшколя в Пшемкові – праца знамениті односит ся до верша. Єст зроблена зо схоснуваньом розмаітых технік – адекватных до заміреных плястичных ефектів.

Михал Суховацкій (8 років, «Земльо моя», школа в Ґладышові) – образ намалюваный безкомпромісово, певном руком, з ромахом і трафністю рукы, якыма не заганьбил бы ся професийный артиста.

Мартин Рутковскій (7 і піл рока, «Земльо моя», школа в Высовій) – знаменита композиция з каскадом вершків, зо зріжницюваныма одтінями зеленого. На поєдных горках розмаіты краєвидовы цікавосткы, а то церковця, а то корова, яблін ци ґазда. Вшытко гарді кореспондує з елементом інспірациі.

Юлиян Баня (9 років, «Земльо моя», школа в Ґладышові) – єдна з невельох робіт, на котрій успішні представлено реалистичный краєвид Лемковины.

Віктория Гутыряк (6 років, «Земльо моя», школа в Бодаках) – робота хоц має очывидну кольористику, має в собі великє насиліня реальной обсервациі краєвиду Лемковины, мож з приємністю слідити його елементы, як псика, уці, придорожный крест, студню ітп.

Павлина Ротко (8 років, «Земльо моя», школа в Ґладышові) – робота захоплює простотом выповіди і має в собі символичны приметы краєвиду, барз старанні потрактувано баранка, потічок і пташка, што є доказом закореніня в традициі і природі Лемковины. Кольоровый напис надає лагідну символику.

Петро Дзямба (9 років, «Земльо моя», школа в Бодаках) – в небанальный спосіб вказує родинный краєвид: горы і дерева при дорозі, деревяну хыжу і в центрі придорожный крест. Робота єст гарді закомпонувана і ясна до одчытаня. Хоснує без мала футуристичны середкы переказу.

Олена Стафіняк (6 років, «Прид весно», предшколя в Пшемкові) – знамениті закомпонувана праца, нетипова, неєднозначна преспектива, малюнок акцентує приметы краєвиду Лемковины

Специяльне выріжніня для Маі Гутыряк (4 рокы, предшколя в Бодаках) – ляпідарна робота, особливі мелянхолийна і в полным вымірі символична. Сут то рідко стрічаны приметы в так молодій творчости.

Вшыткы надосланы працы найдете в нашій поконкурсовій выставі в закладці Знимкы.