Ретро потягы підут Лемковином

Од яри аж по зиму 2018 рока на найкрасшых желізницьовых путях Малопольщы будут проходити переізды ретро потягами, інформуют о тым Малопольскы Пути Желізницьовой Туристикы. Декотры з переіздів будут іти через русиньскы села на Лемковині. Орґанізуваны сут они Новосандецкым Стоваришыньом Любителів Желізниці во спілпрацы зо Скансеном Желізницьового Табору в Хабівці.

В рамках проєкту пройде 46 переіздів в періоді од 13. квітня/апріля до 9. грудня/децембра т.р. Як пишут орґанізаторы в анонсі до проєкту, переізды будут іти того рока м.ін. желізницьовым путьом з Нового Санча до Крениці. Поягы підут через села надпопрадской долины: Верхомлю, Зибрик, Андриівку ци Милик. Желізна дорога веде тіж м.ін. через 513-метровий тунель в Жеґєстові.

Додатковыма атракциями орґанізуваных переіздів є тото, што потягы будут затримувати ся на поєдных стациях цілю пізрити на місцевы туристичны і рекреацийны обєкты. В рамках річной акциі будут проходити і родинны пікнікы участників, выступы музычных ґруп, крамы з закусками та пленеровы історичны реконструкциі.

Окрем выміненых желізницьовых получынь, заплянувано тіж переізды долином рікы Білой ци путьом давной Ґалицийской Трансверсальной Желіниці. Деталі найдете на сайті Малопольскых Пути Желізницьовой Туристикы, де мож і резервувати білеты.