Реляция з талергофскых упамятнінь в Чорным – середа, 20.00 год.

В минулу суботу, 30. вересня/септембра, при памятнику в селі Чорне прошло святкуваня дня памяти про перший концентрацийний лаґєр в Европі – Талергоф, в якым в роках 1914-1917 были інтернуваны і мучены медже інчыма Русины. Упамятніня згромадили парудесят осіб з ріжных части Лемковины.

Подія получена была з отвертьом едукацийно-історичной стежкы з таблицями про історию лаґру і жытя сщмч. Максима Ґорлицкого. Таблиці поміщено попри місци, де находит ся памятник присвячений Максимови Сандовичови і Талергофцям. Єпископ православной перемышльско-ґорлицкой єпархіі Паісий, при участи духовных, одправил при памятнику панихіду за жертвы талергофского лаґру і молебен до священномученика Максима. Пак владыка одзначыл медальом сщмч. Максима Ґорлицкого Дмитра Сабатовича, старосту православного собору св. Тройці в Ґорлицях, як узнаня за працу для добра православной церкви. За службу в ділі помочи другому чловекови угоноруваны медалями остали Юзеф Леґутко – надлісничий Лісництва Ґорлиці, та Ян Косьоровскій – директор Реґіональной Дирекциі Державных Лісів в Кракові, якы причынили ся до теперішнього виду місця упамятнінь.

Дальше голос забрали запрошены гості, Малґожата Малух – війт ґміны Санкова, на обшыри котрой находит ся село Чорне, та Роман Дзюбіна з Рады Ґорлицкого Повіту. Зобраны могли послухати і споминів єдного з двох жыючых свідків посвячыня памятника в 30. роках, Дмитра Сабатовича. Наконец, по почастунку, каждий мал нагоду пообзерати і почытати постійну выставу.

Просиме на реляцию з тых упамятнінь, котра на антені радия ЛЕМ.фм буде выемітувана в середу, 4. жолтня/октобра т.р., о 20.00 год., повторіня вночы з середы на четвер о 4.00 год. та в найблизшу суботу о 15.00 год.

фот. ЛЕМ.фм