Выдавництво RuthenicArt, якє занимат ся публикуваньом книжок присвяченых м.ін. лемківскым темам, печатало нову публикацию. Тым разом з контроверсийным, ачий смутным наголовком – «Реліґійна война в горах. Конфесийны борбы на Лемковині по 1947 році».
Робота, автором якой є Анджей Стаховяк, представлят Лемковину і єй жытелів уж по періоді траґічных выселінь. Книжка односит ся головно до часу по 1956 році, коли до бывшых лемківскых сел, часто зруйнуваных і заселеных польскыма осадниками, вертают з выгнаня поєдны лемківскы родины. Самособом, речений час являт ся тяжкій не лем з огляду на тото, же лемківску достоменніст вынято спід товдшышнього польского законодавства, але тіж за справом ограниченых, або, як в примірі грекокатолицкой церкви, офіцийно ниякых, можности в практикуваню віры.
Лемкы стрічали ся з вельома проблемами по повороті на Лемковину по 1956 році. Єдным з них был ограничений доступ до реліґійного практикуваня. Не дост, же было оно плянуване властю, то додатковы проблемы взглядом східнього християньства шырил римокатолицкій Костел. Доходило тіж до непорозумлінь на фоні православных і грекокатолицкых справ. Єдным з примірів, бодай найбільшого, реліґійного конфлікту на Лемковині, якій явил ся по 1956 році, были борбы в Полянах о тамтышню церков (ґрафіка з поляньском церквом св. Йоана Златоустого находит ся на окладинці книжці).
Публикацию мож уж придбати на офіцияльным сайті RuthenicArt.