Рекрутуют – студиюй!

Кінчыт ся помалы вакацийний період, але покля што лем для учеників основных і середніх шкіл. Студенты мают кусіся ліпше – іх рік полний тяжкой наукы зачынат ся аж в жолтни/октобрі. Єдном з вельох справ, котру молодий чловек рішат по матуральным еґзаміні, є тото, што хоче робити в своім дорослым жытю. Кым буде, чым ся буде занимал і якій достиже в тым хосен, залежыт в великій мірі од студий, якы выбере. Простір специялізаций в днешнім світі є барз шырокій. Мож выберати од типово стислых по істо гуманістичны. Напевно – вельо залежыт од індивідуальных предиспозиций каждого чловека зокрема.

Єдном зо специялізаций, котра являт ся вынятковом, бо єдином в Польщы, є росийска філолоґія зо специялізацийом: русиньско-лемківскій язык. Тоты цікавы студиі были покликаны на Педаґочічным Університеті в Кракові в 2001 році. Актуальні єст отворена іщы рекрутация на сесу специялізацию. Студиі сут направлены на каждого, хто зарахувал матуру – ци то перше, ци пізнійше. На офіцияльным сайті Педаґоґічного Унівесритету находят ся детальны інофмациі, тыкаючы тогорічной рекрутациі на лемківску філолоґію.

Аплікуючым на 2016/2017 студентскій рік треба мати зарахувану тзв. нову матуру з росийского языка, або дакотрого інчого новожытного языка (основний або розшырений рівен). Очывидно, атутом про лемківску філолоґію буде вказаня матурального свідоцтва з выписаным результатом матуры з лемківского языка.

Росийска філолоґія з русиньско-лемківскым языком то стидиі І ступеня, котры тырвают 3 рокы і кінчат ся обороном ліценциятской працы. Од покликаня філолоґіі є она ведена в трибі стацийонарных студий. Чысло місц, на котры будут приняты тот рік студенты, то лем 10, што справлят, же сут то елітарны студиі.

В тым місци треба написати про найважнійшы річы на тоту хвилю – терміны. Час, в котрым мож аплікувати через електронічну реґістрацию, тырват медже 1. -16. вересня/септембра т.р. Дальше термін складаня документів, по тым коли студент отримат позитивну верифікацию в інтернетовым системі рекрутациі, буде тырвал од 5.-16. вересня/септембра т.р. (точны годины отворіня деканату і місце складаня документів – гев).

Модел, якій был задуманий од самого початку, то вывчыти специялистів двойной філолоґіі. По завершыню наукы, особа, котра кінчыт росийску філолоґію з русиньско-лемківскым языком, сміло може ся менувати як специялиста з обшыри тых двох языків. Хоц росийскій язык є общехоснуваным, то быти специялистом од лемківского – як загороженого языка, котрий фурт намагат ся новых досліджынь – може запроцентувати в будучности абсольвента.

Проґрам стидий то не лем стислы занятя, посвячены науці о языку, але то тіж добра давка русиньской культуры та літературы. Окрем занять з дидактичного канону, студенты берут участ в вельох варштатах (м. ін. журналистичных, музычных, театральных, фільмовых, поетицкых), в шкільных практиках, а тіж в культурально-языковых проєктах, орґанізуваных русиньском спільнотом на обшыри Польщы, Словациі, Хорвациі та Сербіі. Вдяка тому, студенты розвивают ся в другых стандардах русиньского языка, звертаючы увагу на спільноту русиньского языка в цілій Карпатскій Руси.

Філолоґія спілпрацує з русиньскыма орґанізациями з Польщы і заграниці. На лемківскым рівни студенты мают можніст спілдіяти і творити новы проєкты м.ін. в рамках Стоваришыня Руска Бурса, Стоваришыня Лемків та Стоваришыня Лемківской Молодежы ЧУГА в Польщы. Окрем того, можлива єст тіж спілпраца на науково-дидактичным рівни з подібныма собі єдиницями в Пряшові (Існтитут русиньского языка і культуры ПУ) і Новым Саді (русиньска філолоґія). Студенты і абслольвенты лемківской філолоґіі з Кракова анґажуваны сут в выдаваня Лемківской Класыкы, печатаной Руском Бурсом, та деякы з них публикют в Річниках Руской Бурсы. Побідні мож стрічати статі студентів в двомісячнику Стоварышня Лемків – Бесіді. По отриманю дипльому, але і вчас студий каждий зо студентів має одкрытий пут аплікувати на члена редакциі лемківскых медий – ґрупы ЛЕМ.фм, в котрій окрем розвитку особистых здібности, годен найти джерело утриманя. Вельо абсольвентів попередніх річників актуальні бере участ в творіню контекстового словника лемківского языка, котрий є рыхтуваний в рамках лемківской філолоґіі на Педаґоґічным Університеті, як тіж в проєкті Міцне Зіля, котрий має за задачу записувати і реконструувати стародавны лемківскы пісні.

Вартат спомнянути на тото, што тішыт каждого студента. На найліпшых ждут стипендиі ректора ПУ, як і міністерияльны, котры сут бодай найвысшым з можливых выріжнінь вчас студиюваня на всякых польскых університетах. Окрем наукы, студенты можут навязувати новы контакты і подорожувати в рамках науковых выіздів. Проґрам є так заплянуваний, жебы на першым році одвидіти Лемковину, другым – Пряшівску Русь, а на третім – Русинів в Сербіі – очывидні, сут то дармовы екскурсиі.

В днешніх часах молоды люде жыют в віртуальным світі, зато заінтересуваны можут сміло зазерати на фейсбуковий фанпейдж філолоґіі: Język łemkowski UP Kraków / Лемківскій язык на ПУ в Кракові, на котрым находят ся інформациі зо студентского жытя старшых річників, як і інформациі тыкаючы специялізациі, яком є русиньско-лемківскій язык.