Реконштрукція Музея Варгола іде подля плану

Реконштрукція Музея модерного уменя Енді Варгола в Меджілабірцях продовжує подля плану. До кінця календарьного року бы мала быти в рамках перебудовы проінвестована сума 12,7 міліона евр.

Почас контрольного дня 19-го авґуста 2024-го року то повів председа Пряшівского самосправного краю (ПСК) Мілан Маєрьскый, інформує аґентура TASR. На реконштрукцію і модернізацію музея ПСК хоснує властны фінанції і дотацію од державы.’

Діло меджінародного значіня

За словами Маєрьского почас реконштрукції появили ся і непланованы роботы, котры выжадали собі додаточны кельчікы в сумі приблизно 400 тісяч евр.

„Початком слідуючого року бы сьме хотіли зачати з роботами в інтерьєрі музея. Очекуєме так само підпору од сучасной влады, жебы сьме годны были комплексно докінчіти тото велике діло, котре має надреґіоналне і меджінародне значіня,“ додав.

Почас пандемії COVID-19 пришов край о часть фінанцованя в сумі 1,7 міліона евр, што было запричінене заставліньом робот. За словами пряшівского жупана вже мали єдну стрічу з премєром і Міністерство фінанцій Словацькой републікы, де было потверджено, же є інтерес тото діло фінанчно підпорити.

Імпулз про турістічный рух

Реконштрукція музея має створити модерный і мултіфункчный простор, котрый буде сповняти сучасны пожадавкы і очекованя навщівників, повів директор музея Мартін Цубяк.

„Ключовым было зробити з той будовы, котра на першый погляд не была вабнов, мултіфункчный, мултіжанровый і барз інтерактівный простор. Напало нам, же унікатным рішіньом бы было скапчати інтерьер із екстерьєром, і то якраз посередництвом стріхы і фасады, по котрых дає ся ходити, посередництвом выужытя стріхы як будучіх експозіцій,“ додав Цубяк.

Подля пріматора Меджілаборець Владислава Вышньовского зреконштрукованый Музей модерного уменя Енді Варгола буде імпулзом про турізм в реґіоні.

„Турістічный рух в Меджілабірцях буде мати цалком іншу дінаміку. Тяжко здогадати, кілько турістів ту прийде. Кедь ту ходило 50 – 70 тісяч турістів, та теперь то буде многократно веце. На тото приготовлюють ся і бізнісовы субєкты, котры інвестують до турістічного руху в цілім окресі, значіть, взникають новы просторы про уквартельованя і стравованя,“ повів Вышньовскый.

Реконштрукція почала в апрілю 2023-го року, одкрытя музея є плановане найпізніше в місцяці юл 2025-го року.