Редакція журнала Отцюзнина стрітила ся з меценатами з Америкы

Як інформовав русиньскый журнал Отцюзнина із Підкарпатя на своїм вебсайті, в понедільок 24-го юна 2024-го року одбыло ся засіданя редакчной колеґії, співробітників і дописователів того журнала.

„На події підняли ся важны вопросы за языкову і редакчну політіку, будучность выдаваня, перезентовала ся штатістіка вебсайту і соціалных сітей журнала вєдно із проґнозами далшого роснутя,“ пише журнал.

На засіданю были тот раз присутны і представителі америцькых Русинів. Помострити роботу редакції пришов професор Павел Роберт Маґочій за Карпаторусиньскый научный центер, котрый має важну роль в тім, же журнал подарило ся в минувшім році обновити, а так само Марія і Мері Кетрін Сілвестрі із Фундації Джона і Гелен Тімо.

„Якраз із фінанчнов підопоров тых двох орґанізацій на днешній день выдає ся Отцюзнина, за што сьме їм дуже вдячны.“

Засіданя проходило в Ужгороді, де америцькы Русины пришли із Пряшова, кедьже три тыждні присвятили тому місту з нагоды проходжіня Studium Carpato-Ruthenorum 2024 – Меджінародной літньой школы русиньского языка і културы. Тоты дві орґанізації окрім іншого довгодобо підтримують посередництвом штіпендій і штудентів, котры на літню школу до Пряшова хотять прийти.

На засіданю брав участь і голова Народной рады Русинів Закарпатя Євген Жупан, голова орґанізації Карпатьскый Русин Васлиль Щербей, і далшы.

„Радостьов про рeдакчну колеґію є, же меценаты і далше мають дяку фінанцовати журнал, котрый стає з каждым выданьом ліпшый,“ написав шефредактор журнала Отцюзнина і голова Русиньского културолоґічного клубу Юрій Шиповіч.