Редакция, то єст сила

В суботу, 3. жолтня/октобра 2020 р., в просторах історичной будівлі Руской Бурсы в Ґорлицях проходила осіння стріча редакторів ансамблю медияльной ґрупы ЛЕМ.фм+.

Была то стріча інча як попередні. Не лем зато, што редакция рішыла основны пляны на будучый рік повязаны з промоцийом повселюдного списуваня, але тіж зато, же была то такой перша стріча без нашого долголітнього шефредактора і основателя радия, бл. п. Богдана Ґамбаля (1965-2020).

Памят на того, што вшытко зачал

Засіданя одбыло ся згідно з пляном о 10.00 год. рано. Одкрыла го теперішня ведуча Стоваришыня «Руска Бурса» в Ґорлицях, Наталия Малецка-Новак. Пак голос забрал Петро Медвід з Пряшова, якій попросил вшыткых присутных, жебы минутом тишы вшанувати памят покійного Богдана Ґамбаля, якій одышол з того світа 2. липця/юлия 2020 р.

Покійный был тым, котрый протягом свого жытя не лем довюл до зверніня польском державом маітельскых прав до будинку Руской Бурсы в Ґорлицях (2009), але неодолга пак зреалізувал долгожданый проєкт – перше лемківскє радийо (2011). Як раз Богдан Ґамбаль позберал молодых люди, жыючых так во вшыткых реґіонах Карпатской Руси, як тіж в західній Польщы ци Украіні, жебы побудувати сильну, загальнорусиньску журналистичну редакцию. Доказом на тото, же ся му сесе повело, была примірно як раз суботня стріча.

Согласно каждый з присутных підсвідомо спостерюг, што Богдан Ґамбаль, наш приятель і редакцийный колеґа, напевно днес смотрит деси з горы на нас, пильнуючы і позераючы на свою редакцию. Тішыт ся. Повинністю молодой ґенерациі редакторів ЛЕМ.фм єст продолжати діло ним зачате.

Повселюдне списуваня, школіня

В дальшій части засіданя редакцийный ансамбль бесідувал про пляны на будучый рік. Єдным з пріоритетів будучой діяльности єст зрыхтуваня шырокой кампаніі перед повселюдным списуваньом, котре в Польщы і на Словациі одбуде ся в 2021 р. ЛЕМ.фм хоче, жебы діяня направлены на промоцию лемківской, русиньской нацийональности і рідного языка выстартували іщы того рока.

Важным пунктом была так само бесіда повязана з ґрафіком авдиций в 2021 р. Більшіст редакторів высловила волю рыхтувати новы проґрамы, але вшытко буде залежне од фінансуваня проєкту Міністерством Внутрішніх Справ і Адміністрациі Польской Республикы, котре фурт хоче ограничати фінансову підпору ЛЕМ.фм, без якой не мож продолжати реального радия.

Посліднім пунктом были школіня з ріжных обшыри редакцийой роботы. Технічный редактор Павел Малецкій вюл науку професийонального монтажу радийового материялу, так жебы іщы ліпше оправити якіст трансмітуваных авдиций. Были рішаны і інчы технічны проблемы і справы, котры сут необхідны для каждого з редакторів до штоденной роботы в радию і на інформацийным портали www.lem.fm.