Райнфусы зас розданы

В минулу пятницю 7. листопада т.р. в Етноґрафічным Музею ім. Северина Удзєлі в Кракові проходило торжественне розданя Нагорід Малопольского Воєвідства ім. Романа Райнфуса. Нагороды ім. Р. Райнфуса признаваны сут за выдатны і вынятковы осягніня в обшыри хороніня локальной культуровой достоменности в Малопольщы. Минулого рока єдным з выріжненых остал Петро Трохановскій. Того рока зас звернено увагу на особливіст, яка занимат і занимала ся пропаґуваньом знаня про Лемків.

Єдным з нагородженых остал Антоні Крог – еноґраф, тереновий дослідник, знавця народной культуры Карпат, ініциятор і куратор конкурсів сучасной карпатской народной різбы. В 1984 році, в не так далекых, хоц іщы комуністычных, часах, коли о Лемках голосно іщы нихто одважні не бесідувал, А. Крог разом з Петром Трохановскым зорґанізувач в Ґалериі Колишня Синаґоґа (Dawna Synagoga) в Новым Санчы выставу посвячену істориі і культурі Лемків і написал повыставовий каталоґ (Łemkowie: katalog wystawy), якій был пак часто рецензуваний. Антоні Крох остал одзначений Райнфусом в катеґориі “Подіі пропаґуючы знаня о вартости і значыню локальной культуровой спадковины”.

Антоні Крог є окрем того автором вельох публикаций, в якых підкрислал право Лемків в Польщы быти вызнанима як окрема нацийональна ґрупа, м.ін. Rekolekcje łemkowskie, Kim są Łemkowie?, Jeszcze o Łemkach. Крог был тіж єдным з першых авторів, якы пропаґували ідею створіня Музею Лемківской Культуры в Зындрановій. Помагал прирыхтувати до друку спомины Лемка старшого поколіня, Романа Хомяка, якому повело ся вернути до рідного села (Nasz łemkowski los), вплітал до своіх публикаций оповіданя про Лемків (Sklep potrzeb kulturalnych, O szwejku i o nas).

Більше про конкурс можете дознати ся за тым мотузком.