Радийовий концерт Юлиі Дошны і Антония Пільха

В посліднім часі маме приємні великє нагромаджыня радийовых концертів, котры, як думаме, можут заінтересувати чытачів нашого порталю. В минулу пятницю в ряшівскым одділі Польского Радия выступувала Оркєстра св. Миколая (чытайте гев), а тепер приносиме інформацию о наступпным концерті нажыво, котрий буде мож почути на антені Польского Радия Ополе.

В тамтышнім Студию “М” заграт і заспіват дует, котрий уж долший час можеме видіти на вельох сценах . Лемківска співачка – Юлия Дошна і польскій лютниста – Антоноий Пільх, выступлят з концертом названым Пейзажы малюваны пісньом. Лемковина і Надсаня в працах Оскара Кольберґа. Концерт буде емітуваний Польскым Радийом Ополе 29. мая од 19.00-20.00 год. Частоты, на котрых высылат тота стация найдете за тым мотузком, а любителі дуету Ю. Дошна & А. Пільх, котры находят ся поза польом радийового переказу, можут слухати опольску стацию через інтернет – за тым мотузком.

Юлия Дошна і Антоний Пільх в своім репертуарі часто презентуют стары, забыты, або одгребаны (напр. Оскаром Кольберґом) пісні. З нагоды Різдвяных Свят мож было іх чути з колядами, щедрівками, ци різдвяныма піснями, в періоді Великого Посту слухачы могли почути страдальны пісні, але шувна част репертуару то світскы, заспіваны і заграны з великым лемківско-польскым серцьом, пісні.

Неодолга, 5. червця т.р., Юлия Дошна і Антоний Пільх выступлят в лемківскій Новици, де будут проходити VIII Театральны Стрічы Інновіца 2015 (чытайте гев).